El Reinu Uníu da'l preste a la construcción de centrales nucleares nueves

"El Gobiernu británicu autorizó ayeri nel Parlamentu la construcción de centrales nucleares nueves, ensin imponer llendes a la espansión de la enerxía atómica nun momentu nel que volvió surdir a nivel mundial la defensa d'esta fonte d'enerxía, despreciada a lo llargo d'años.

El secretariu d'Enerxía británicu, Jonh Hutton, argumentó pa desarrollar esta midida que Reinu Uníu necesita construyir centrales nucleares p'algamar les sos metes en materia de llucha esocntra'l cambiu climáticu y pa torgar la dependencia de la importación d'enerxía mientres se reduz el suministru de crudu procedente del Mar del Norte.

""Les centrales nucleares nueves puen tener un papel que xugar nel futuru enerxéticu del país xunto a otres fontes con pequeñes emisiones de carbonu"", sorrayó Hutton énte'l parlamentu. ""Nun tengo intención de poner barreres artificiales a la proporción d'enerxía que'l Reinu Uníu ye quién a xenerar nin nel sector nuclear nin n'otres fontes baxes n'emisiones de carbonu"", precisó.

El 2003, el Gobiernu británicu calificó la enerxía nuclear d'opción non atractiva, pero dende qu'entamaron a subir los precios del petroleu y del gas, ésta fízose más competitiva, y per otru llau, l'oxetivu de recortar emisiones de carbonu pa combatir el cambiu climáticu intensificóse.

De fechu, en países como Francia y Finlandia tan construyéndose nueves centrales nucleares y n'EE.UU, les compaíes entamaron a pidir llicencies pa la so instalación, lo que refuercia esta nueva perspectiva de que la enerxía atómica supón una parte de la solución de los problemes enerxéticos del mundiu.

Los operadores nucleares dicen que podríen poner en marcha les neuves plantes britániques cerca del añu 2017, lo que pue dar puxu a los oxetivos de recorte d'emisones de carbonu del Gobiernu británicu de cara al 2020. ""Ye una bona noticia que se tomaren finalmente estes decisiones. Reinu Uníu necesita reducir les sos emisiones de gases ivernaderu mientres se compromete la existencia de fontes d'enerxía segures cada día"", sorrayó'l vicepresidente de la Royal Society, academia científica independiente británica, Peter Wiliams. Cerca del 18% de la electricidá del Reinu Uníu xenérase de magar enerxía nuclear, pero les últimes plantes nucleares del país van pesllase nel 2035. Los analistes piensen que les enerxíes renovables nun van ser bastante pa sustituyiles.

La opinión pública británica ta dividida frente a esti asuntu, con un 44% a favor de que les compañíes tengan opción d'investigar en nueves enerxíes nucleares y un 37% a la escontra.
La principal razón qu'argumenten los que tan a la escontra ye la toxicidá de los residuos que xeneren les centrales, que resulten peligrosos y contaminantes por cientos d'años."