El Gobiernu asturianu va presentar esti mes na Xunta la llei de creitu estraordinariu pa financiar l'alcuerdu social

"El Gobiernu asturianu trabaya na ellaboración d'una llei de creitu estraordinariu que sirva pa financiar l'Alcuerdu pa la Competitividá, l'Emplegu y el Bienestar d'Asturies (Aceba) pa qu'esti puyeda superar l'actual marcu de prórroga presupuestaria pal 2008. L'Executivu tien previsto presentalu na Xunta Xeneral del Principáu (XXPA) esti mes, según informó la conseyera d'Alministraciones Públiques y Vocera del Gobiernu, Ana Rosa Migoya.

La dirixente esplicó qu'una bien de la financiación ya se contempla nel presupuestu prollongáu, mientres que'l restu va venir avaláu pol creitu estraordinariu. ""Esperamos que cuenta col apoyu de los grupos parlamentarios, porque se trata de los intereses xenerales de la nuesa comunidá"", dixo.

A xuiciu de Migoya, la firma del Aceba ye una de les bones noticies pa un 2008 n'Asturies, qu'entama ""de manera estraordinaria"". Esplicó que l'alcuedu llogróse colos axentes sociales gracies al ""esfuerciu"" del Gobiernu y de sindicatos y empresarios, fixando oxetivos ""mui ambiciosos"" pal desarrollu de la rexón.

Per otru llau, Migoya tamién se refirió al conveniu marcu del Plan Nacional de Calidá de les Agües firmáu ayeri cola ministra de Mediu Ambiente, Cristina Narbona. A xuiciu de Migoya trátase d'otra ""escelente noticia"" nesti entamu del 2008.

Esplicó que va permitir qu'Asturies tenga una inversión ""histórica"" en materia de saniamientu y calidá de les agües, con 582 millones d'euros. ""Ye la mayor cifra que se dio pa esta materia"", señaló. ""Somos la primer comunidá autónoma d'España que firmó un alcuerdu d'estes característiques"", y agradeció al Ministeriu ""la so sensibilidá"". Sicasí, dixo que la decisión nun foi ""casual"", sinón frutu del trabayu del Gobiernu d'Asturies en materia de proteición y conservación medioambiental.

Migoya comentó, pa finar, que'l conveniu va sirvir pa meyorar les condiciones d'Asturies, de cara a que seya ""más atractivu"", sobre tou en dalgunes actividaes económiques como'l turismu o la implantación de nueves empreses."