Entama la carrera pol rectoráu de la Universidá d'Uviéu

"L'acabante de dimitir vicerrector d'Ordenación Académica de la Universidá d'Uviéu y dende ayeri candidatu oficial al rectoráu nes próximes elecciones de la institución académica asturiana, Antonio Cueto, aseguró que nun comprometió nengún puestu del so equipu de xestión nel casu de que ganara los comicios. L'aspirante realizó estes declaraciones nuna rueda de prensa na qu'anunció públicamente la so dimisión como vicerrector y la so participación nes próximes elecciones al Rectoráu de la Universidá, posibilidá cola que trabayaba dende qu'hai cuatro años entrara a formar parte del equipu del entovía rector Juan Vázquez.

Tres confirmase la non participación del actual vicerrector d'Investigación, Pedro Sánchez Lazo, y les recientes declaraciones del mesmu, favoratibles a trabayar nel equipu de dalgunos de los candidatos nel casu de victoria electoral, Cueto descartó que pactara col mesmu ún de los vicerrectoraos. ""Respeto y agradezo'l xestu de Sánchez Lazo, quien desarrolló un perbon llabor al frente del so Vicerrectoráu, pero nun comprometí con naide nengún puestu, y nun lo voi facer hasta dempués de les elecciones"", esclarió. Cueto muéstrase per otra parte convencíu de tar preparáu y tener apoyos bastantes pa concurrir a les elecciones. Nun considera al director del departamentu de Química Orgánica y Inorgánica, Vicente Gotor, el principal rival a batir. ""Tolos candidatos merecen el máximu respetu y la máxima preocupación"", señaló.

Descartó per otra parte la posibilidá de llegar a alcuerdos o aliances electorales escontra Gotor colos consideraos candidatos progresistes: la catedrática de Derechu Internacional, Paz Andrés, y el ya ex vicerrector d'Estudiantes, Santos González, dimitíu tamién ayeri pa participar nes elecciones. ""Nun toi d'alcuerdu coles calificaciones polítiques nin les etiquetes, porque contribúi a crear posiciones d'antagonismu na Universidá"", matizó. Amás, consideró positiva la participación de cuatro candidatos, en llugar de los dos qu'únicamente participaron nos comicios del 2004. ""Pienso que ye bono que na Universidá haya posiciones distintes, y toi seguru de que toos ellos van llegar hasta'l final del procesu"", señaló, confiáu en que nun van producise descartes enantes d'abril, mes nel que va tener llugar la votación. Per otra parte, el candidatu consideróse ""en parte"" continuador del programa de trabayu del actual rector, pero dexando claro que ""va ser la época de Cueto y non la de Vázquez"". Mostróse agradecíu al tovía xestor universitariu por incorporalu al so equipu nel 2004, asina como a tolos miembros del mesmu pola so collaboración con él. Tamién s'espresó ""satisfechu"" pol desarrollu del so trabayu."