Clinton vence a Obama nes primaries demócrates

"El senador republicanu John McCain y la senadora demócrata Hillary Clinton ganaron les primaries de los sos respectivos partíos en New Hampshire, una de les primeres batalles nel procesu d'elección estáu por estáu de los candidatos presidenciales. Les dos batalles electorales de New Hampshire fueron reñíes. Clinton ganó a Obama con un 39 por cientu de los votos frente a un 37 por cientu, mientres que McCain quedó primero que Romney con un 37 por cientu frente al 32, casi acabáu'l recuentu.

Les primaries de New Hampshire son les segundes d'altu nivel, dempués d'Iowa, nel procesu d'elección estáu por estáu de los candidatos presidenciales republicanos demócrates pa les elecciones de payares, que finen el 5 de fabreru, cuando 22 estaos van elixir a los candidatos. McCain, senador d'Arizona, presentaba una candidatura que foi calificada polos medios estaounidenses como una causa perdida fai unos meses. L'aspirante dixo, tres la so victoria: ""esta nueche enseñámos-yos cómo ye una reapaición"". La otra triunfadora, Clinton, senadora de Nueva York, dixo: ""Quiero dar les gracies especialmente a New Hampshire"". Sorrayó que na última selmana escuchó a los votantes de New Hampshire y que nesi procesu escuchó la so propia voz falando dende'l corazón y agradeció a los votantes que respondieren al so llamáu. ""Agora, xuntos, vamos dar a América esti puxu que New Hampshire ta acabande a de dame a mí"", añadió.

El principal rival de Clinton, Barack Obama, aseguró tres la vitoria de la senadora: ""tovía toi motiváu y llistu pa lluchar"". ""Quiero felicitar a la senadora Clinton por una victoria duramente disputada equí, en New Hampshire. Fizo un trabayu esceicional"", añadio. Amás, esclamó que ""nesi momentu, nestes elecciones, dalgo ta pasando n'América"". El republicanu Mitt Romney, ex gobernador de Massachusetts, que quedó en segundu llugar señaló: ""otra plata, hubo tres carreres hasta agora. Algamé dos plates y un oru, gracies Wyoming. Pero esta nueche, norabona al senador John McCain por facer una carrera de primera. Felicidaes pol oru, senador"". Anque reconoció que prefería ganar él, eloxó la campaña del so adversariu. El demócrata Jonh Edwards, ex senador de Carolina del Norte, dixo que va permanecer nesta carrera ""hasta que recuperemos realmente'l suañu americanu y reforciemos y restauremos a la clase media d'América"". ""Pídovos a toos equí a toos vosotros, que podéis oyir el soníu de la mio voz, esi 99 por cientu de voces nun fueron escuchaes tovía nesta democracia, que vos unáis a nós, nesta campaña de bases pa crear l'América na que toos creemos"". Los cantidatos republicanos Mike Huckabee, ex gobernador d'Arkansas; Fred Thompson, ex senador de Tenessee y Rudy Giulliani, ex alcalde de Nueva York, destacaron que New Hampshire ye sólo'l principiu d'una llarga carrera."