El Ministeriu d'Economía y Facienda garantiza la financiación de les obres p'acabar l'ampliación d'El Musel

El Ministeriu d'Economía y Facienda garantizó la financiación de les obres restantes p'acabar l'ampliación del puertu. El procedimientu va acordase nuna próxima xunta ente'l Principáu d'Asturies y el Ministeriu de Fomentu, según informó'l Gobiernu asturianu tres caltener el presidente del Principáu, Vicente Álvarez Areces, un conceyu cola vicepresidenta segunda del Gobiernu y ministra d'Economía y Facienda, Elena Salgado.

   Demientes l'alcuentru, el presidente del Principáu y la ministra trataron diferentes temes de l'actualidá económica n'Asturies, ente ellos los aspeutos fundamentales de l'ampliación del Puertu de Xixón.

   Según informaron alministración central y asturiana, Salgado confirmó a Areces el plenu compromisu del Gobiernu cola ampliación del Puertu de Xixón, "un proyeutu esencial pal futuru d'Asturies".

   La selmana pasada, el Ministeriu d'Economía y Facienda remitió a Bruseles un informe xurídicu y técnicu como alegaciones a la carta unviada pola Comisión Europea'l pasáu 16 d'abril, referente a la propuesta de modificación de la Decisión d'aprobación del proyeutu de Fondu de Cohesión pa El Musel.

   Según recordó'l Principáu, el 13 d'avientu del 2004, la Comisión aprobó una ayuda pal proyeutu d'ampliación del Puertu de Xixón, que consiste na construcción de 3.880 metros de dique y contradique, muelle de 1.250 metros de llargor y el rellenu d'una superficiea de 140 hectárees. L'importe de l'ayuda correspondía al 55% del total del coste del proyeutu, 247,5 millones d'euros.

   Dempués, la obra sufrió un modificáu imprevistu, polo que s'unvió a la Comisión una propuesta de modificación del proyeutu qu'incluyere'l cambiu y sobre la que la Comisión Europea informó negativamente'l pasáu 16 d'abril del 2009.

   El Ministeriu d'Economía y Facienda treslladó a la Comisión Europea la so voluntá de caltener la propuesta de modificación del proyeutu en base a los informes xurídicos y técnicos realizaos pola Abogacía del Estáu, qu'indiquen claramente que tol procesu de modificación s'axustó a la más estricta llegalidá.