L'Arribada convoca'l III Premiu Timón

|

L’Asociación Cultural l’Arribada ta acabante de dar anuncia de la convocatoria del "III Premiu Timón", col que se quier facer reconocencia d’una trayectoria lliteraria d’especial valir construyida "n’asturianu o en cualesquiera de les variantes propies del dominiu asturllionés". El plazu pa la presentación de candidatures ta abiertu dende'l 24 de mayu y fina’l 30 d’agostu viniente. Los ganadores anteriores fueron, en 2007, la poetisa va poco fallecida Nené Losada Rico, y en 2008 Xuan Xosé Sánchez Vicente.

Les candidatures puen tar presentaes por una persona o un colectivu nes señes de corréu electrónicu que siguen:larribada@gmail.com y tendrán d’acompañase con una xustificación de candidatu/a de non menos de dos folios, escritos per una cara, onde s’amuesen los méritos y se dea cuenta de la obra lliterario escrito. Pa esta edición opten al gallardón los/es escritores que nacieren nel añu 1959 o primero d’esta fecha.

Al efectu de fallar el premiu, l’asociación convocante aconceyará un xuráu integráu por persones venceyaes a la cultura del país. Esta distinción, que consiste nuna obra del escultor y ceramista xixonés Jesús Castañón, entregaráse durante la celebración de l’Arribada 2009.

L’"Arribada, Vagamar Lliteraria y Cultural", ye un foru destináu a la "promoción de la realidá lliteraria, cultural y idiomática de la comunidá autónoma asturiana y d’otres comunidaes pertenecientes al mesmu dominiu llingüisticu".
 

Contador Estadistiques