El Gobiernu asturianu autoriza un parque eólicu nuna zona d'altu valor arqueolóxicu

El pasaú 3 d'abril la Conseyería de Mediu Ambiente dio'l preste al parque eólicu de Carondio y Murellos (Ayande) nuna zona catalogada como "d'altu valor arqueolóxicu", una orde publicada pol BOPA con data de 30 d'abril. La Comision d'Urbanismu y Ordenacion del Territoriu del Principáu (CUOTA) aprobó, con un Plan Especial, esti proyectu, el d'un parque que dende'l 2001 nun salía p'alantre por tratase d'una zona con bayura de túmulos neolíticos.

Genesa, filial d'Hidrocantábrico, propunxo'l plan pa Carondio nel 2001. Anguaño, la empresa pertenez nun 80 por cientu a NEO Energía, que ye'l brazu renovable de HC Energía, qu'a la vez fai parte del Grupu EDP, con base en Lisboa. Según el proyectu orixinal, Genesa quería llantar 61 molinos en Carondio y Murellos, qu'a la fin quedaren en 51. Cada torre, de 45 metros, taría enllazada colos demás molinos al traviés d'una rede baxo tierra de 15,8 km. Les llinies d'evacuación diríen a la subestación que tien Genesa n'El Puertu'l Palu, a ocho quilómetros de distancia. En total, les paliadores tendríen que mover 10.428 m3 de tierra. El 3 de xunu ye'l límite pa presentar alegaciones.

Zona d'interés arqueolóxicu

Carondio fai parte d'un continuum prehistóricu nel que s'atopen dólmenes como A Llastra da Filadoira. Hai poco alcontráronse tamien restos d'un campamentu romanu. Amás de tener el dolmen da Filadoira hai otros 33 dólmenes y tumulos d'época neolítica a la vera de la Carreiriega de los Gal.legos nes sierres de Carondio y Murellos. Tratase d'un camín prehistóricu que diba dende'l valle del Navia hacia'l valle del Narcea. Sicasí, Carreiriega nun inventariada acordies col so valir nel Serviciu de Patrimoniu d'Asturies.