Migoya defende al Gobiernu nel unviu d'un DVD a la emigración

"La Conseyera d'Alministraciones Públiques y Vocera del Gobiernu, Ana Rosa Migoya, echó-y al PP la so ""mezquindá"", ""mala fe"" y ""despreciu a los emigrantes"" poles sos crítiques al unvíu d'un DVD a la diáspora asturiana con un mensaxe del presidente Vicente Álvarez Areces felicitándo-yos la Navidá. La responsable negó, en declaraciones a Europa Press, que'l coste del unvíu fuera de 600.000 euros como dixo'l diputáu del PP, Fernando Goñi, y aseguró que foi inferior a 100.000 euros al utilizase pa la felicitación un DVD editáu con motivu del 20º aniversariu de la marca 'Paraísu Natural'.

La Conseyera negó que'l DVD seya publicidá institucional y defendió los derechos de los asturianos nel esterior. ""Nun se trata de publicidá sinón d'una felicitación de Navidá en formatu DVD porque los emigrantes asturianos tienen derechu a que'l presidente los felicite"". La Conseyera insistió en que ""nun hubo coste dalgún de realización"". ""Ficimos copies d'un videu ya editáu que salen a 0,50 céntimos caúna, muncho más barates que la felicitación en papel, pero'l PP paez non enterase de qu'ésti ye un formatu habitual y tien precios realmente baxos"", espunxo Migoya. La conseyera negó tamién que s'unviaren 70.000 copies como diz el PP, sinón 47.986 que se remitíeron a aquellos países onde existe comunidá d'asturianos. ""El PP tien gana de confundir a los ciudadanos asturianos y despreciar a los nuesos emigrantes que, tamos seguros, tán agradecíos por un xestu como ésti"", dixo Migoya. La vocera del Gobiernu insistió amás en que ""ye hasta una obligación que'l presidente del Principáu se dirixa una vez al añu a los asturianos que tuvieron que salir fuera del Principáu pa manifestar el so recuerdu"". Tamién respondió Migoya a les crítiques del diputáu del PP al conteníu del videu qu'ésti calificó de ""hortera"".

La Conseyera dixo non entender ""los motivos polos que se puen calificar d'horteres imaxes precioses d'Asturies"". Na so opinión ""eso diz muncho de quién lu define asina"". El DVD inclúi un discursu d'Areces y unos dibuxos animaos que representen que personaxes mitolóxicos d'Asturies que muestren distintos puntos de la comunidá. En cuantes a la solicitú d'información rexistrada ayeri na Xunta Xeneral del Principáu per parte del grupu parlamentariu del PP p'algamar información sobre la edición y distribución del DVD, Migoya insistió en que va dase tola información necesaria porque'l Gobiernu asturianu ""nun tien nada qu'ocultar"". Aseguró, sicasí, que ""tola información ""reduzse a lo qu'espliqué anteriormente"". Defendió, de la mesma manera, el derechu del Gobiernu asturianu ""a comunicase colos ciudadanos"". ""Lo que-y molesta al PP ye que mos dirixamos a tolos asturianos nel esterior y ellos lo agradezan"", reiteró. Insistió de la mesma manera en llamentar el despreciu del PP hacia los asturianos que tán nel esterior. ""Nun-yos importen los nuesos emigrantes"", dixo pa recordar a continuación a los populares qu'apoyaron ""una iniciativa d'Izquierda Xunida pa modificar la llei d'asturianía a la escontra de lo que quieren los asturianos y los centros asturianos""."