El Farho Xixón Baloncestu ponse lider de la lliga tres ganar al Prat

"El trunfu sobre'l Prat y la derrota del Illescas n'Almería -tres xugar una prórroga- punxeron de nueves al Fahro Xixón Baloncestu como lider de la lliga LEB Plata -empataos a trece victories colos toledanos, pero con meyor ""basket average"" pa los asturianos-. La victoria costó-yos muncho a los xixoneses y el resultáu foi mui apretáu, 74 a 78. El C. B. Prat Joventut, filial del Joventut de Badalona d'ACB, tres esta derrota queda últimu na clasificación. L'equipu xixonés nun pudo cuntar pa esti partíu con Sony Vázquez, que va tar de baxa cerca d'un mes por una rotura de frebes, y xugó menos minutos de lo normal Brandon Wolfram, que tien problemes nuna rodiella. Un aspeutu a destacar foi'l gran partíu de Peter Rajniak -23 puntos y 3 rebotes, con cuatro triples de siete intentos- y de Matt Kiefer, que fizo dobles figures -18 puntos y 15 rebotes-.

El partíu entamó con ventayes locales, tres un 2 a 0 y un 4 a 2, dende ehí punxóse delantre nel marcador el Faho Xixón, colos catalanes aguantando'l resultáu colos triples de David Martínez. Nel segundu cuartu los xixoneses llegaron a tener doce puntos de ventaya, 22 a 34, pero dempués pilancaron y tuvieron munches perdes de balón, llegando los locales a empatar a 36, anque al descansu llegóse con ventaya asturiana de dos puntos, 36 a 38. Marc Rubio metió nesti cuartu ocho puntos. Tres el descansu los catalanes llegaron a ponse delantre con 43 a 42 tres un triple de Marc Rubio. Un 0 a 8 pa los asturianos punxó'l resultáu en 46 a 53. A lo cabero'l cuartu'l resultáu yera de 48 a 54. Nel últimu cuartu los locales llegaron a ponese a un punto 59 a 60, pero nun foron a remontar, anque entá tuvieron cerca de los xixoneses.

Ficha técnica:

C: B: Prat Joventut: David Martínez (21), Jofre Lleal (9), Marc Rubio (13), Jesús Benito (4) y Christopher McNaughton (6). Tamién xugaron: Jordi Vall-Llobera (11), Carlos Martín y James Williams (10).

Farho Xixón Baloncestu: Rubén Suárez (5), Peter Rajniak (23), Adrián García (11), Chus Pineda (5) y Matt Kiefer (18). Tamién xugaron: Sergio Alonso, Lucian Kieser (2), Logi Gunnarsson (7) y Brandon Wolfram (7). Árbitrios: José María Terreros y David Planells. Nel Farho Xixón Baloncestu foi elimináu por cinco faltes personales Rubén Suáre y nel Prat McNaughton.

Partíu de la decimoquinta xornada de la Lliga Addeco LEB Plata xugáu nel Pavelló Joan Busquets del Prat de Llobregat, cola asistencia d'unes doscientes persones. Parciales per cuartos: 16-21, 20-17, 12-16 y 26-24."