El gobiernu asturianu considera "un agraviu" l'incrementu llinial del 2% de cuota llechera propuestu pola UE

"El Gobiernu del Principáu d'Asturies calificó de ""agraviu"" pa los ganaderos de la comunidá l'incrementu llinial del dos por cientu de cuota llechera propuestu nel Reglamentu de la Unión Europea, de cara a la desapaición del sistema de cuotes prevista pal 2013. Dende l'Alministración asturiana compártese la visión del sector, según la cual, la midida nun ye bastante y va beneficiar a los países con escedentes, como'l casu de Francia.

Nestos términos pronuncióse güei la viceconseyera de Mediu Rural del Principáu, Tomasa Arce, enantes d'asistir a les xornaes sobre 'El futuru de la ganadería nel contestu internacional européu', organizaes pol sindicatu agrariu Asaja, nel auditoriu Príncipe Felipe.

Pa la responsable autonómica, l'incrementu ""ye un agraviu"" porque ""un dos por cientu coloca a les esplotaciones de países con escedentes nuna situación muncho más competitiva y más viable"". La viceconseyera recordó que ""l'Estáu Español, con un déficit de casi tres millones de tonelaes, en relación a la producción y el consumu, sigue tando agraviáu"". ""L'incrementu ye mui pocu, y mos coloca en peor situación que les esplotaciones franceses o qu'otros países con escedentes productivos"", concluyó. Por esti motivu, Arce espera que'l Ministeriu d'Agricultrua Pesca y Almentación (MAPA) conceda ""un tratu especial nel repartu de cuota pa les rexones con dificultaes de producción, de zones de montaña y otros factores qu'aumenten los costes, pa caltener un sistema competitivu"". ""N'Asturies les esplotaciones llecheres son vitales pa la pervivencia de los núcleos rurales"", concluyó.

Pela so parte, l'Asociación Agraria de Jóvenes Agricultores (Asaja) tien ya puesta l'atención na nueva situación de magar el 2013, y el previstu final del sistema de cuotes. Pal so presidente n'Asturies, Ramón Artime, ye necesaria una refinanciación del sector pa compensar el ""gran adeudamientu del sector"", que se debe ""esclusivamente a la compra de cuota"".

Artime esplicó qu'agora tamos falando de ""desapaición de les cuotes, cuando munchos años tuvimos invirtiendo nelles"". Previó poro que ""va haber ganaderos que cuando les cuotes desapaezan van tener que siguir pagando lo que mercaron primero"". Señaló amás, que ""ún de los grandes incrementos de costes de producción que tuvo'l ganaderu foi precisamente l'amortización de la cuota"". ""Con costes de 50 pesetes el llitru, sacábense 10 pesetes de beneficiu por llitru"", comentó en relación a la situación vivida nos últimos años nel campu asturianu.

Artime anunció que'l so sindicatu va tar pendiente del comportamientu del mercáu de magar 2013. ""Vamos ver si los rusos y los chinos"", en referencia a los principales países importadores de lleche, ""siguen comiendo yogur"", comentó. Dende'l so puntu de vista, ""dempués de los adeudamientos en compra de cuota, y l'aumentu de costes de producción, un tendencia a la baxa nel preciu de la lleche pue conllevar al zarru total del sector n'Asturies"". Recordó nesti sen que nel últimu plan d'abandonu convocáu pol Ministeriu presentáronse ya 200 ganaderos asturianos que sumen más de 20 millones de kilos de cuota. Al so xuiciu, ""hai qu'abrir negociaciones a nivel rexonal cola Conseyería y dempués defender el resultáu ante'l Ministeriu, y a la so vez el Ministeriu tien que tomar una posición clara en Bruseles"". Pero p'Asaja, la solución principal ye ""compensar a los ganaderos de dalguna manera, y poro"", comentó Artime, ""una de les coses que tenemos pensao plantegar ye una refinanciación del sector""."