Llamazares denuncia que los debates televisivos ente Zapatero y Rajoy "tán amagostaos"

"El coordinador xeneral d'Izquierda Xunida, anunció que'l so partíu tien la intención de ""recurrir y boicotiar"" los dos debates que van protagonizar nes próximes selmanes el xefe del Executivu, José Luis Rodríguez Zapatero, y el presidente del PP, Mariano Rajoy, porque al so xuiciu, ""tán amagostaos"". En rueda de prensa, Llamazares denunció qu'estos alderiques, que tán ""pautaos y amagostaos"", atenten escontra'l pluralismu políticu que reconoz la Constitución y asítiense ""al marxe hasta de les resoluciones de la Xunta Electoral Central"".

Asina, criticó que ""too ta predeterminao"" pa los alcuentros ente los cabezaleros de los dos partíos mayoritarios, de manera qu'a los medios de comunicación ""dáse-yos el papel únicamente d'emitir los debates"", polo que de fechu ""puen realizase na sede del PP o na sede del PSOE"". Ante esta situación, Llamazares aseguró que'l so partíu nun va ""quedar colos brazos cruciaos"" y va ""recurrir y boicotiar"" los debates, que ""nun tenten d'aportar reflexones a la sociedá española sinón d'emprobecer el pluralismu políticu"". D'esta manera, y anque aseguró que tovía nun se concretaron les midíes que van tomar, el máximu dirixente d'IX esplicó que, amás de tomar midíes xurídiques pa la defensa de los sos derechos violaos, van usar tolos instrumentos políticos. En concretu, IX va facer un llamáu a los profesionales de los medios pa que ""nun se dexen engañar"" y, n'exerciu de la so obligación de serviciu públicu, ""permitan la presencia de toles fuercies polítiques y nun se sumen a estos combates amagostaos, nos que puen prescindir hasta de los periodistes"". Amás, va pidir l'apoyu de la ciudadanía y del conxuntu de la izquierda, asina como de los votantes d'IX, p'algamar el so oxeitvu y que los debates seyan pluralistes."