Asturies foi la comunidá onde menos creció'l preciu de la vivienda nueva nel 2007

El preciu mediu de la vivienda nueva nes capitales de provincia incrementóse un 5,1% demientres l'añu 2007 respecto al exerciciu anterior, asitiándose la de tipu mediu nos 2.905 euros por metru cuadráu construyíu, según informó güei la Sociedá de Tasación (ST).

Asturies foi la comunidá onde menos s'incrementaron los precios (0,9%). Nel segundu semestre del añu, l'incrementu del preciu de la vivienda nueva foi del 1,1%, lo qu'espeya una menor subida respecto al primeru. Con tou, la vivienda nueva viéndese actualmente a un preciu casi nueve veces superior al que se vendía en 1985. A lo llargo del añu, el preciu mediu aumentó en toles capitales de provincia, menos en dos d'elles. En 12 capitales, el crecimientu de los precios asitióse ente'l 7% y el 9% respecto al pasáu añu, n'otres 20 capitales el preciu aumentó ente'l 5% y el 7%, y en 16 d'elles asitióse perbaxo del 5%. Los dos descensos alcontráronse en Segovia (-2,7%) y Vitoria-Gasteiz (-2,5%). La Sociedá de Tasación prevé, de cara al 2008, que'l preciu de la vivienda tienda a estabilizar con incrementos na contornada del IPC. "El preciu de la vivienda va tener, previsiblemente, xubes más moderaes naquellos conceyos que dispongan de mayor ufierta de terrén edificable". Per otru llau, la Sociedá de Tasación indica que, colos datos estimaos pol Ministeriu de la Vivienda sobre'l númberu d'inmuebles entamaos enantes de setiembre del 2007, el total de viviendes empezaes nel añu va superar les 750.000, cantidá "mui importante", pero inferior a l'algamada nel añu 2006.

El preciu de la vivienda nueva de tipu mediu nes capitales de provincia asitióse nel mes d'avientu en 2.905 euros por metru cuadráu construyíu, que pa una vivienda de 100 metros cuadraos equival a 290.500 euros. Nes 21 poblaciones de más de 100.000 habitantes que nun son capitales de provincia analizaes por Sociedá de Tasación, el preciu mediu del metru cuadráu astióse en 2.437 euros, lo que supón un incrementu internaual del 4,4% y del 0,5% respecto al semestre anterior. Nes poblaciones de más de 50.000 habitantes, los precios crecieron nos últimos doce meses un 5,9% y un 0,9% dende xunetu del 2007, hasta 2.208 euros por metru cuadráu.