El númberu d'accidentes de tráficu con muerte descendió n’Asturies un 22% nel 2007

El numberu d'accidentes de tráficu con resultáu de muerte baxó n'Asturies un 22 por cientu nel añu 2007. Nel pasáu produxéronse 46 choques col resultáu de 50 persones muertes, mientres que nel añu 2006 produxéronse 54 accidentes con 64 muertos. El delegáu del Gobiernu nel Principáu d'Asturies, Antonio Trevín, dio a concoer en rueda de prensa na sede de la Delegación los datos d'accidentes y sobre los controles d'alcoholismu y consumu de drogues realizaos nel 2007.

Trevín tuvo acompañáu del Xefe Pronvincial de Tráficu del Principáu, Ignacio Campomanes. Antonio Trevín destacó que los accidentes con firíos graves baxaron nun 34 por cientu pasando de 32 nel añu 2006 a 21 nel 2007. Pela so parte, al cifra de firíos de poca importancia baxó nun 68%, pasando de 66 nel 2006 a 21 l'añu pasáu. El delegáu del Gobiernu aseguró que la modernización de les víes ayude a baxar la cifra d'accidentes. Manifestó que na última década elimináronse munchos puntos negros nes carreteres asturianes cola creación d'autovíes. "Nel 1990 rexistráronse 118 muertos nes carreterres y el pasáu añu baxó a 50", apuntó. Respecto a les infracciones por velocidá, Trevín felicitó a tolos conductores asturianos al afirmar que les Fuercies y Cuerpos de Seguridá del Estaú nun aplicaron tovía'l nuevu Códigu Penal pa sancionar a los conductores que pasaren les llendes de velocidá. "Nesti sen tamos perbaxo de la media nacional", añadió'l Delegáu del Gobiernu que destacó la concienciación per parte de la sociedá asturiana como ún de los motivos que reducen la cifra de siniestros.

En cuantes a los accidentes mortales y muertos en motocicleta y ciclomotor nes carreteres del Principáu, la cifra "caltiénse". Nel 2007 morrieron 5 persones en motocicletes y 2 persones en ciclomotor, les mesmes cifres que nel 2006. Por ello, Trevín reconoció que "queda muncho por facer" nesti sen y manifestó que van desarrollase campañes de concienciación pa baxar estes cifres. Respecto a los datos relativos a los controles d'alcoholemia fechos nel Principáu nel 2007, Trevín señaló qu'Asturies ta penriba de la media española en pruebes que dieron "positivu". Fueron 57 test los que dieron una tasa superior n'alcohol a los niveles establecíos. Dos persones dieron más de 1,2 miligramos por llitru n'aire respiráu de lo establecíu; 11, penriba del 1,0; 16 persones penriba del 0,8 y 24 persones más de 0,6 miligrmaos por lllitru n'aire respiráu.

Trevín manifestó tamién que la xefatura provincial de tráficu va intensificar los controles y les campañes de concienciación pa torgar que les persones conduzan ensin tener el permisu de conducir. Demientres el pasúa añu 2007 fueron 45 persones les que fueron denunciaes por non tener la llicencia de conducir. Pela so parte, Ignacio Campomanes valoró "positivu" el carné por puntos y manfestó que les principales causes de los accidentes de tráficu son les distracciones, la invasión del carril contrariu, non guardar la distancia de seguridá y la velocidá escesiva.