El Constitucional permite a Iniciativa Internacionalista participar nes europees

El Tribunal Constitucional estimó'l recursu d'amparu presentáu por Iniciativa Internacionalista-Solidaridá ente los Pueblos (II-SP) contra l'anulación, per parte del Tribunal Supremu, de la so candidatura pa les elecciones al Parlamentu Européu del próximu 7 de xunu. Considera asina qu'esta llista, encabezada pol dramaturgu Alfonso Sastre, pue presentase a les elecciones.
 
La Sala Segunda del altu tribunal, que lleva aldericando esti asuntu dende primer hora de la mañana, acoyó en parte los argumentos espuestos polos representantes d'II-SP nel so recursu, ente ellos la condena espresa del usu de la violencia pa fines políticos. Tanto la Fiscalía como l'abogacía del Estáu consideraron nes sos alegaciones que tal condena llegaba tarde, tres l'anulación de la candidatura, y amás carecía de valor por ser xenérica y nun refrise a ETA espresamente.
 
Nel so recursu d'amparu ante'l TC, presentáu'l pasáu llunes, II-SP manifestaba "de manera clara y sin ambigüedaes que nunca utilizó medios que nun seyan politicos, siendo l'usu de la violencia completamente ayenu a la so forma d'aición y cultura política", y espresaba "un claru refugu y condena del usu de la violencia pal algame d'oxetivos políticos nel marcu d'un Estáu Democráticu".
 
El Tribunal Supremu consideró que la candidatura d'II-SP ye un simple "ardiluxu" del entonru d'ETA pa caltenese nes instituciones democrátiques, y que tres analizase'l perfil de los promotores, representantes, candidatos y avalistes d'II-SP, entendióse que "la candidatura nun ye más qu'una simple instrumentalización d'un oxetivu, el de facer que l'entornu políticu d'ETA siga calteniendo la so presencia nes institucianes democrátiques, nesti casu nel Parlamentu Européu".