El Sporting sal del descensu

|

Había que ganar y l'equipu asturianu ganó. Trés puntos que suponen salir del descensu y afrontar les dos últimes xornaes con ciertes garantíes de permanencia y enforma sabiendo que depende de si mesmo. Un trunfu nun Molinón enllenu nel que'l públicu foi'l xugador númberu doce del Sporting. Una ciudá, Xixón, y un país, Asturies, que merecen seguir en primera.

El Sporting paez que ta avezáu a ponese les piles namás que cuando tien un pie en segunda. Nesta xornada volvió conseñar l'afirmación. Depués del desastre d'Almería lo mesmo l'equipu que l'afición teníenlo claro: o se ganaba al Málaga o descendíase a Segunda. Afortunadamente ganó, pero con un marcador d'infartu que, sicasí, nun espeyó los méritos d'ún y otru equipu nel campu.

Y ye que l'Sporting salió a dominar, buscando'l gol dende'l primer minutu énte un Málaga decepcionante, con poca profundidá y feble en defensa, y que namás llevó peligru nes xugaes a balón paráu. D'esti mou durante la primer parte los asturianos tendríen una riestra d'oportunidaes de gol que diben estrellase contra ún de los meyores porteros que pasó pel Molinón: Goitia. Sicasí, nel minutu 23 llegaría por fin el premiu a la insitencia local gracies a un remate de cabeza nel área de Gerard qu'acabó na rede visitante. L'equipu asturianu quiso resolver bien llueu'l partíu, y siguió manteniendo l'actitú ofensiva. Pero diba ser el Málaga'l que daría la réplica de la única forma que podía ser: a balón paráu. welington remató de cabeza, llibre de marca, un centru de Duda. Ehí acabóse'l Málaga.

Na segunda parte la suerte que n'otros partíos-y faltó a los asturianos llegó en forma d'un gol en propia del defensa malaguista Rosario, que remató de cabeza axustando'l balón al palu llargu de Goitia. A partir d'esi momentu tuvo más cerca'l terceru de los locales que l'empate de los visitantes, como na clarisima oportunidá de Diego Castro, que pudo rematar solu delantre del porteru, pero que prefirió controlar el balón a la media vuelta, na que fue la meyor ocasión del partíu xunto a un trallazu de Barral que sacó espectacularmente'l meyor xugador visitante, el porteru Goitia.

El Sporting queda con 37 puntos, cuartu pel final, empatáu a puntos col Osasuna. Salvó asina la so pimera final pa la permanencia. Queden otres dos, Valladolid y Recreativo. Un calendariu qu'abre series espectatives de permanecer na máxima categoría. Sicasí, col Sporting nunca ta dicha la última palabra.

Ficha Técnica

Sporting de Xixón 2- Málaga 1  

Sporting: Cuellar, Sastre, Gerard, Iván Hernández, Cámara (José Ángel m 80), Matabuena, Diego Camacho, Pedro (Bilic m 75), Kike Mateo, Diego Castro (Michel m 87) y Barral.

Málaga: Goitia, Gámez, Weligton, Rosario, Nacho (Rossato m 77), Eliseu, Apoño, Miguel Ángel, Duda, Baha y Luque.

Goles: 1-0 Gerard (m 23), 1-1 Welington (m 37), 2-1 Rosario en propia portería (m 52)

Árbitru: Undiano Mallenco (navarru). Sacó tarxetes amarielles a Diego Castro (m 39), Apoño (m 60), Adriano (m 65), Matabuena (m 73), Weligton (m 89) y Barral (m 90).

Contador Estadistiques