El Principáu va exixir que s'acredite residencia n'Asturies dende'l 1 de xineru pa optar a ayudes del automóvil

El Gobiernu del Principáu d'Asturies va exixir que s'acredite residencia n'Asturies, polo menos dende'l 1 de xineru del 2009, p'acceder a les ayudes pa la compra d'automóviles anunciaes pol presidente del Gobiernu, José Luis Rodríguez Zapatero. L'oxetivu d'esti requisitu, que complementa a los fixaos pol Gobiernu central, ye garantizar que'l beneficiariu de la sovención seya asturianu.
 
El Plan anunciáu por Zapatero convida a les comunidaes autónomes a sumase a él pa la cofinanciación de caún de les ayudes, pa les que los constructores van aportar mil euros, el Gobiernu del Estáu 500 euros y les comunidaes autónomes incorporaes al Plan otros 500.
 
La finalidá d'esti plan ye favorecer la compra de vehículos nuevos, más seguros y menos contaminantes, asina como incentivar al sector de l'automoción nesta situación de crisis económica. La midida nun sólo tien impautu naquellos llugares onde tán les principales fábriques sinón tamién, como ye'l casu d'Asturies, onde hai productores de componentes o empreses que realicen primera o segunda tresformación de materies primes destinaes al sector de l'automoción y nos concesionarios, según informó'l Gobiernu asturianu nuna nota prensa.
 
Dende Asturies, se treslladó al Ministeriu d'Industria que'l Plan del Gobiernu central s'amplíe a les motos. El conseyeru d'Industria y Emplegu, Graciano Torre, realizó esta propuesta al Executivu central demientres la Conferencia Sectorial informativa celebrada ayeri en Madrid ente'l Ministeriu y les comunidaes autónomes.