SUATEA y CC.OO. concentráronse ante Presidencia pa pidir la creación d'especialidá docente d'asturianu

|

Partidarios de la creación d'especialidá docente de Llingua Asturiana y Gallego-Asturianu na enseñanza concentráronse ayeri ante la Presidencia del Gobiernu asturianu pa exixir la creación de la mesma, convocaos polos sindicatos Suatea y Comisiones Obreres.
 
Los ellí axuntaos enseñaron una pancarta na que se lleía la conseña 'L'asturianu na plantiya de centros yá', y lleyeron un comunicáu nel qu'espresaron la problemática que pal profesoráu de Llingua Asturiana nos institutos y escueles conlleva la falta d'una especialidá oficial reconocida.
 
El testu recordó que "los profesores d'asturianu tán abocaos a ser interinos, y nun se-yos da opción de dir a oposición, nin se da oportunidá a los funcioarios de carrera d'escoyer eses places en concursu de tresllaos".
 
Recordaron amás que la Conseyería d'Educación "nun fizo efeutiva la sentencia del Tribunal Supremu que ganó Suatea, na que se declara contraria a derechu la existencia de les plantiyes funcionales". "Les places d'Asturianu y Gallego-Asturinau teníen que pasar a forma parte de plantiya orgánica y ser vacantes col estatus de plenu derechu a tolos efeutos. Tratábase d'un pasu fundamental pa garantizar y dignificar la presencia de la nuesa llingua nel sistema educativu asturianu", añadió'l comunicáu.
 
Dao que "la llingua asturiana nun ta nes mesmes condiciones que'l restu d'asignatures", Suatea y CC.OO mostraron la so intención de "siguir reclamando l'abertura de negociaciones pa da-y al asturianu'l mesmu estatus qu'al restu d'asignatures y va exixir el cumplimientu estrictu de la llei del asturianu y del plan de normalización no que cinca a esti tema", acabó'l testu.

Contador Estadistiques