Asturies y Lleón estudien xunir Fuentes de Invierno y San Isidro pa crear "la meyor" estación del cordal cantábricu

El Principáu d'Asturies y la Diputación de Lleón estudien la posibilidá d'unir les estaciones ivernales de Fuentes de Invierno y San Isidro pa crear la "meyor" infraestructura d'esquí del Cordal Cantábricu, una estación que "nun tenga nada qu'envidiar" a les dependencies ivernales de los Pirineos. Asina lo manifestó la presidenta de la Diputación de Lleón, Isabel Carrasco, al acabar el conceyu calteníu cola conseyera de Cultura y Turismu del Principáu d'Asturies, Mercedes Álvarez González.

   Dambes representantes opinaron que la unión de les estaciones d'esquí ye posible, anque pa desarrollar esti proyeutu diba ser necesaria una ampliación de les instalaciones existentes y el so posterior xestión diba ser una cuestión que se pue tratar de manera "cenciella".

   El tema fundamental del alcuentru calteníu ente dambes alministraciones foi la llinia eléctrica que va comunicar les dos estaciones ivernales, que va realizase nel menor plazu posible, anque nun s'avanzaron feches daes les dificultaes derivaes de les característiques orográfiques de la zona, les condiciones climatolóxiques y medioambientales, amás de tar a la espera de conocer el trazáu exactu de la llinia.

   La llinia eléctrica va salir de La Raya, en San Isidro, y va soterrase en tol so trayeutu col fin de respetar les condiciones medioambientales. Amás, va valir pa potenciar "muncho más" el desarrollu de les estaciones ivernales de Fuentes de Invierno y San Isidro y atrayer al mayor númberu posible de turistes. "Asturies y Lleón tán uníes por munchos llazos fraternales al traviés de la so historia y tamos dando un pasu más pa qu'eses linies y esa collaboración seya posible", apuntó Mercedes Álvarez.

   Pela so parte, Isabel Carrasco aseguró que la llinia va ser una realidá "pronto" y precisó que demientes el día de güei, técnicos d'Iberdrola y de la Xunta de Castiella y Lleón s'alcuentren nes estaciones pa determinar el trazáu exactu de la llinia, dao que la valoración d'impautu ambiental señaló dalgunes midíes correctores.