Viaxe al Hubble

|

Ensin retrasu sobre l'horariu previstu, la misión de la Nasa STS-125 Atlantis, despegó de Cabu Kennedy con destín al telescopiu espacial Hubble. Ye la cuarta y última vegada que se va remocicar l'observatoriu robóticu y el vuelu, arrodiáu d'espectación, tien una complexidá que lu faen un fechu hestóricu pa la astronáutica.
 
El Hubble diseñóse pa ser visitáu periódicamente poles llanzaderes americanes. Esti vuelu tuvo n'entredichu dende'l accidente del Columbia nel añu 2003. La órbita del observatoriu impide que'l tresbordaor pueda abellugase na estación si ye que cualisquier contratiempu, avería o accidente grave asina lo aconseyara. Defechu cuando la traxedia del Columbia tovía se taba investigando ya había voces qu'afirmaben categóricamente que una misión de reparación al Hubble diba ser imposible. El telescopiu espacial vuela a una órbita que prácticamente tien el doble d'altura que la de la estación internacional, lo que complica muncho les coses y aumenta en munchos factores el riesgu pa la tripulación.
 
Pero l'observatoriu que lleva el nome del que descubriera la expansión del universu tenía que ser dexáu aldebalu si nun s'acometíen xeres de remocicamientu urxentes. La comunidá astronómica mundial solicitó en repetides ocasiones a la Nasa la necesidá de reparalu aludiendo al fechu de que si nun s'abordaba una decisón pel estilu habría unos años ensin poder contar con una ferramienta científica desti calibre ente que se pudiera diseñar, construir y llanzar el siguiente gran telescopiu espacial, el xigante "James Webb", que ya ta en fase de montaxe y que verá la so primer lluz nel añu 2.015. Esos años de parón sólo podríen ser refugaos si s'acometía la cuarta y cabera misión de reparación al Hubble. La misión de les misiones que tou astronauta sueña con volar, sólo comparable, en complexidá, a los viaxes a la lluna.
 
La misión STS-125 Atlantis ta comandada por Scott D. Altman, el pilotu ye Gregory C. Johnson y los especialistes de misión: Michael J. Massimino, Michael T. Good, K. Megan McArthur, John M. Grunsfeld (que ye l'astronauta xefe de los paseos espaciales) y Andrew J. Feustel.
 
Pa visitar una galería de semeyes de la misión: http://spaceflight.nasa.gov/gallery/images/shuttle/sts-125/ndxpage1.html
 
Pa ver un resumen interactivu de la misión: http://www.nasa.gov/externalflash/hubble_servicing/
 

Contador Estadistiques