Alfredo González actúa en Llangréu

El próximu 9 de mayu, dientro de la programación d’Encuentrautores09, Alfredo González va actuar en Llangréu. El Nuevu Teatru La Felguerá va acoyer un conciertu d’esti cantautor turonés que nel añu 2008, cola publicación del so primer trabayu n’asturianu “La Nada y tu”, ganó una montonera premios (Premiu al meyor cantar en llingua asturiana08 por el cantar “La nada y tu; Premiu de la Crítica de la RPA al Meyor Discu d´Autor, por La nada y tu;  Premiu Amas al Meyor Lletrista y Premiu AMAS al Meyor Videoclip, por “El último taxi” de Sr. Paraguas).

Alfredo González tien grabaos hasta la fecha dos discos en castellán: “La vida de alquiler” (autoedición, 2003) y “Dudas y precipicios” (DFX Records, 2003). “La nada y tu” (Ámbitu/L’Aguañaz, 2008) ye’l so primer trabayu n’asturianu. “La nada y tu” ye un discu ente’l pop y la música de cantautor nel que’l cantautor de Turón indaga n’asturianu nos territorios del amor y de la muerte. Nesti trabayu Alfredo trabaya con testos propios y otros d’autores asturianos, poniendo música a poemes d’Antón García, Pablo Texón y Xandru Fernández y otros. El conciertu va ser el sábadu 9 de mayu a les 20:15 hores, y la entrada tien un preciu de 4 €.