L'Academia de la Llingua celebra'l Día de les Lletres con José Ángel Hevia como nuevu "académicu d'honor"

El perconocíu gaiteru maliayu José Ángel Hevia va ser nuevu académicu d'honor de l'Academia de la Llingua Asturiana. El nombramientu va tener llugar nel tradicional actu institucional que l'ALLA entama tolos años nel Teatru Campoamor d'Uviéu con motivu del Día de les Lletres Asturianes, que va ser esti vienres a les 20:30 hores.

Esti XXX Día de les Lletres Asturianes va tener nel músicu José Ángel Hevia ún de los sos protagonistes por cuenta que va ser nombráu académicu d'honor. L'actu académicu, que va entamar a les 20:30 hores va abrise cola actuación del gaiteru Yago Bugallo. Darréu d'ello va desendolcase la Xunta Estraordinaria que va nombrar al músicu asturianu como académicu, tres lo cual va tener llugar el tradicional discursu institucional de la Presidenta de l'ALLA, Ana Cano. L'actu va zarrase con una esbilla de poemes y l'actuación de "Xuacu Amieva Folk". De seguío va celebrase una espicha nel restaurante La Gruta de la capital asturiana.