Representantes del mundu de la política, la cultura y la llingua lleen testos d'una trentena d'autores asturianos

Representantes del mundu de la política, la cultura y la llingua asturiana tomaron parte güei na tradicional llectura de testos de llingua asturiana, entamada pola Xunta Xeneral del Principáu d'Asturies pa conmemorar la Selmana de les Lletres Asturianes de manera oficial. Escoyeron una tretena d'autores de llingua asturiana  pa esta ocasión, la mayor parte d'ellos sacaos de la publicación de microrrelatos 'Caminos que naide triara', que ta acabante de presentar la Conseyería de Cultura.
 
L'actu abriólu la presidenta de la Xunta, María Jesús Álvarez González, qu'enantes de lleer 'Adosina', de Chechu García, destacó la "necesidá de promocionar y espardir la nuesa llingua, como una ferramienta de comunicación y un instrumentu de la creación artística".
 
Dempués d'ella tomó la pallabra la conseyera de Cultura, María Mercedes Álvarez, y dempués el restu de convidaos, unos con mayor y otros con menor soltura na llectura de testos en llingua asturiana. Ente ellos taba'l conseyeru d'Educación, José Luis Iglesias Riopedre, qu'escoyó 'Alcordances de mio güela', de María Luz Pontón; la conseyera de Bienestar Social, Noemí Martín, prefirió 'Apocalipsis', de Dolfu Camilo; mientres que'l responsable de Salú,  José Ramón Quirós dio llectura de 'Fuxida', d'Esther García López.
 
El diputáu del PP, Joaquín Aréstegui lleyó un párrafu d'Héctor Pérez Iglesias, mientres que'l parlamentariu d'IU, Jesús Iglesias, escoyó 'Transmisión', de Xavier Frías Conde. Otros parlamentarios fueron los populares Emilio Pérez Cueva (Na alcordanza, de Xurde Fernández), Alfonso Román ('La Forxa del héroe', de Xuan Santori) o Cristina Coto (qu'escoyó un testu de Marián García); les diputaes d'IU Diana Camafeita y Emilia Vázquez dieron llectura de 'L'astrónomu' d'Iris Díaz Trancho y 'Cosmogonía' de Xuan Bello.
 
Otros qu'intervinieron fueron la presidenta de l'Academia de la Llingua Asturiana, Ana Cano, qu'escoyó 'La lluminaria encesa', de Nené Losada, y Vicente Gotor, rector de la Universidá d'Uviéu, que lleyó 'Cáviles', de Montserrat Garnacho Escayo.