UNA y Andecha Astur, presentense en solitariu a les elecciones europees del 7 de xunu

Unidá Nacionalista Asturiana y Andecha Astur serán los dos partíos políticos d'ámbitu asturianu que se van presentar en solitariu a les elecciones europees del 7 de xunu. La segunda d'estes formaciones pudo a lo último inscribir la so candidatura, pese a que de primeres una resolución xudicial torgára-ylo tres suspender provisionalmente les sos actividaes.
 
Dambes formaciones figuren na llista de partíos políticos que se van presentar al procesu européu, publicada güei oficialmente nel Boletín Oficial del Estáu (BOE) pola Xunta Electoral Central.
 
La llista d'Andecha Astur ta encabezada por Mario Arbesú, que yá fora candidatu a l'alcaldía de Noreña por esta organización, y qu'en delles ocasiones quedó a pocos votos d'algamar la representación municipal. Nel númberu dos figura Arturu Xosé Bermeyu, y nel númberu trés Paloma García Fernández.
 
Pela so parte, UNA yá informare ayeri nun comunicáu de que presenta al so militante xixonés Daniel Fernández Blanco de númberu ún, siguíu por Yolanda González Huergo, y Fernando Ornosa, ex voceru del Conceyu Abiertu pola Oficialidá, nel númberu trés.
 
A dambes organizaciones torgó-yos el Bloque Nacionalista Galego la posibilidá de tomar parte na coalición Europa de los Pueblos, poles rocees qu'esti partíu tien hacia'l nacionalismu asturianu. Andecha Astur formare parte d'esta coalición nes últimes elecciones al parlamentu européu, mientres qu'UNA tuviere negociando la so incorporación pa les próximes.
 
El que sí dirá en coalición ye'l  Bloque por Asturies que tará  incluyíu na llista  de la que formen parte tamién Izquierda Xunida, Iniciativa Per Catalunya-Verds, Esquerra Unida i Alternativa. Pablo Fernández, actual voceru de la organización, ta incluyíu dientro de la candidatura presentada por esta alianza de partíos d'izquierdes.
 

Per otra parte, en rellación al restu de partíos, figuren les principales formaciones con representación parlamentaria, como'l PSOE, el PP, la coalición d'IU con Iniciativa per Catalunya, que van presentase col nome de 'La Izquierda', y Unión Progreso y democracia (UPyD) que s'estrena nunes europees.
 
Les formaciones nacionalistes se presenten en dos coaliciones distintes: 'Coalición por Europa', qu'agrupa a CiU, PNV y Coalición Canaria, y Europa de los Pueblos-Verdes, de la que formen parte ERC, BNG, Aralar, Eusko Alkartasuna y la Chunta Aragonesista, ente otros.
 
Nel llistáu apaecen partíos estraparlmentarios de diversu carácter: centristes como'l CDS, el Centr Democrático Liberal y la Unión Centrista Liberal; izquierdistes como'l Partido Obrero Socialista Internaiocnalista (POSI), Iniciativa Internacionalista-La Solidaridad entre los Pueblos o Solidaridad y Autogestión Internacionalista; o feministes como Iniciativa Feminista.
 
Hailos tamién de la derecha clásica o de los autodenominaos d'unidá nacional, como Democracia Nacional, Alternativa Española, Falange Española, Falange Auténtica y de les JONS, y comunistes, como Unificación Comunista d'España, y el Partíu Comunista de los Pueblos d'España. Tamién tán el Partíu Carlista y La Falange.
 
De la mesma manera, s'inscribieron les coaliciones Izquierda Anticapitalista-Revolta Global, y Libertas, na que s'integraron Ciudadanos, que participa la primer vez nunes elecciones al Parlamentu Européu y que yá cuenten con un diputáu nel catalán.
 
Inclúise tamién la coalición ecoloxista Los Verdes-Grupo Verde Europeo, y formaciones de corte rexonalista como Extremadura Unida, Unio Valenciana, Partit Republicá Catalá o Salamanca-Zamora-León Prepal.
 
Otres candiatures inscrites, dalgunes yá veteranes, son el Partido Humanista, Familia y Vida, Por un Mundo más Justo, Partido Antitaurino contra el Maltrato Animal, Partido Integral y Ciudadanos Agobiados y Cabreados.
 
Sin embargu, nesta ocasión nun van participar, ente otros, el Partido Cannabis, que nel 2004 foi la octava fuerza más votada, y llogró más de 54.000 votos, la Plataforma por la Tercera Edad nin Los Parados.