El númberu de paraos asturianos baxa en 611 persones n'abril y el númberu de desemplegaos s'asitia en 73.770

|

El númberu de paraos baxó en 611 persones nel mes d'abril nel principáu d'Asturies, un 0,82 por cientu menos sobre'l mes anterior, colo que'l númberu total de desemplegaos asturianos s'asitia nos 73.770, según los datos fechos públicos güei pol Ministeriu de Trabayu y Inmigración que muestren que si se comparen estos datos colos rexistraos hai un añu, el desemplegu creció n'Asturies un 41,76 por cientu.
 
Asturies foi asina una de les cuatro comunidaes nes que descendió'l paru, xunto a Baleares con 3.207 paraos menos, Estremadura con 2.023 menos y Galicia con 822 desemplegaos menos.
 
A nivel estatal, el númberu de paraos rexistraos nes oficines del Institutu Nacional d'Emplegu (Inem) subió en 39.478 persones, sobre marzu (+1,1 por cientu), rexistrando la so decimotercer subida mensual siguida, hasta asitiase'l total de desemplegaos en 3.644.880 persones, el so nivel más altu de la serie histórica comparable, entamada en 1996.
 
Pese a ser el peor datu nun mes d'abril en tola serie histórica comparable, qu'entama en 1996, la subida ye mui paecida a la rexistrada n'igual mes del 2008 (+37.542 paraos) y supón la tercer parte de la que s'esperimentó en marzu (+123.543 paraos).
 
Amás, el datu d'abril acaba cola racha d'ascensos siguíos de más de 100.000 paraos que se venía rexistrando dende había seis meses.

Contador Estadistiques