Representantes d'Asturies, Baleares, Euskadi, Cataluña y Galicia participen nes xornaes de mocedá y llingües minorizaes

Representantes d'asociaciones y entidaes que trabayen pola normalización llingüística en dellos territorios del Estáu van tomar parte'l próximu fin de selmana nes xornaes 'Mocedá y llingües minorizaes', entamaes pol Conseyu de la Mocedá d'Asturies y la Xunta pola Defensa de la Llingua.
 
L'actividá presentóse güei en rueda prensa nel Conseyu de la Mocedá ofrecida pol presidente d'esti órganu, Paulino Feito, y la representante de la Xunta pola Defensa de la Llingua Asturiana, María Xosé Martínez.
 
Trátase, según explicó Feito, de poner en "común diferentes esperiencies de normalización llingüística en de llingües minorizaes en diferentes llugares del Estáu", si bien matizó que'l restu de zones tienen una diferencia con respeuto a Asturies, y ye qu'ellí la so llingua ye oficial equí nun lo ye.  
 
Feito definió esta oficialidá como una "ferramienta" pa la normallización y aseguró que n'Asturies "la mocedá ta mayoritariamente" por ello.
 
Les xornaes van desarrollase el vienres 8 y el sábadu 9 de marzu nel Auditoriu d'Uviéu. El primer día, a les 11.30 hores, van intervenir Asier Armondo, de la Coordinadora d'Euskaldunización y Alfabetización (AEK, poles sos sigles n'euskera), Xosé Antón González Riaño, de l'Academia de la Llingua Asturiana, y Marta Carrió, del Consell de Juventut Balears. Toos ellos van falar sobre los 'Enfoques educativos de les llingües minorizaes'. Esti mesmu día, de tarde, va celebrase la manifestación pola oficialidá, coincidiendo cola celebración del Día de les Lletres Asturianes, de magar les 19.00 hores na Estación Renfe.
 
Al día siguiente, a les 10.00, David Forniés, del Centru Internacional Escarré pa les minoríes étniques y les naciones (Ciemen), y Xurde Blanco Puente, presidente del Aconceyamientu de Xuristes pol Asturianu, pa dar una charra sobre les ferramientes pola normalización nel ámbitu políticu y llingüísticu.
 
A les 12.00, cola mesma temática, va ser el turnu de Penélope Miranda, presidenta de l'Asociación de Trabayadores de Normalización Llingüística n'Asturies, y Nancy Domínguez, responsable del Serviciu de Normalización Llingüística del Consello da Xuventude de Galicia.
 
A les 17.00 hores, va haber una mesa redonda de 'Medios de comunicación: oportunidaes y torgues pa la diversidá llingüística'. Participarán Rhodri ap Dyfrig, del Mercator (Gales), Montse Besada Vergara, productora del programa 'Xabarín Club', de la Televisión de Galicia, Beatriz Redondo Viado, directora del selmanariu Les Noticies, Próspero Morán, director del portal d'Internet Asturnews, y Fernando de la Fuente Trabanco, director del portal d'Internet Asturies.com.
 
Paralelamente, en diferentes conceyos asturianos, van organizase talleres de diverses técniques de creación artística en rellación cola llingua asturiana, como la ellaboración de cómics, el maquillaxe o la fotografía dixital. Tamién se va facer un mural pola oficialidá y va xugase un partíu pola oficialidá, a les 17.00 hores nel Polideportivu de la Pola Llaviana.
 
Equí pues consultar el programa d'estes xornaes