L'Sporting algama un empate con tastu a derrota

|

Un gol nel minutu 90 del Athletic de Bilbao arrampló colo que diba ser un trunfu merecíu y necesariu del Sporting ayer n'El Molinón. Esti primer empate fai que los asturianos sumen un puntu anque entá sigue en puestos de descensu, empatáu con un Getafe que marca la salvación. La llaceriosa actuación del árbitru volvió a torgar la víctoria de los sportinguistes.
 
Los asturianos salieron, como nun podía ser d'otra forma, al ataque énte un Athletic contundente en defensa y feble n'ataque, pensando más na final de la Copa (el cambiu de Llorente al poco d'entamar el partíu ye sintomáticu) que nel Sporting. Y anque la primera parte foi de dominiu de los asturianos, volvió a faltar lo que se ta echando de menos nos últimos partíos: esi últimu pase o últimu remate que da'l gol. Y cuando lu hubo, estrellóse contra la muria de piernes de la defensa d'un Athletic enzarráu nel so campu.
 
Na segunda parte los asturianos siguieron intentándolo una y otra vez. Michel distribuyendo, Bilic peleando cada balón, Castro intentando desbordar pela banda o Carmelo na frontal. Sicasí'l xuegu desentonó dalgo nel ataque por un Barral mas preocupáu en xugar pa él que pal equipu. L'acosu desesperáu a los vascos diba tener por fin la so recompensa nel minutu 60 gracies a un remate de cabeza de Bilic nel aréa pequeña que fue a la rede d'Iraioz. A partir d'esi momentu un Athletic que nun tuvo mas remediu que salir al ataque y l'actuación del árbitru cántabru diben propiciar l'empate visitante. D'un corner precedíu de falta a Matabuena non señalada diba llegar el gol vascu. Un mala salida de Cuéllar tres botar el corner y un xaréu de piernes y rebotes nel área sportinguista acabó na rede local cuando'l partíu taba yá casiqué acabáu.
 
Empate inxustu d'un Sporting que mereció'l trunfu y actuación arbitral desastrosa y malintencionada contra los locales de Teixeira Vitienes, que non señaló dos penaltis a favor del Sporting (ún por manes d'Amorebieta y otru por un emburrión nel área a Barral).
 
Los asturianos queden con 34 puntos en puestos de descensu, empataos col Getafe. El próximu partíu, otra final, ye contra l'Almería, un equipu que yá nun se xuega nada. Una oportunidá nueva p'algamar l'esperáu trunfu.
 
Ficha técnica
 
Sporting de Xixón 1-Athletic de Bilbao 1
 
Sporting: Cuellar, Sastre, Gerad, Iván Hernández, José Ángel, Michel, Diego Camacho, Carmelo (Luis Morán m 84), Bilic, Diego Castro (Matabuena m 87) y Barral.
 
Athletic: Iraizoz, Iraola, Aitor Ocio, Amorebieta, Koikili, Del Olmo (Etxebarria m 62), Goñi (Muñoz m 45), Javi Martínez, Susaeta, Llorente (Vélez m 18) y Toquero.
 
Goles: 1-0 Bilic (m 60). 1-1 Iraola (m 90)
 
Árbitru: Teixeira Vitienes (cántabru). Espulsó al segundu entrenador del Sporting, Iñaki Tejada, y sacó tarxetes amarielles a Iván Hernández (m 47), Gerard (m 51), Barral (m 52) y Matabuena (m 89).

Comentarios

Comparto la llectura fecha pol redactor, pero sumamos un puntu qu'hai que dalu por buenu ganando al Almería. Teniendo en cuenta l'enfrentamientu directu ente Getafe y Osasuna, una victoria sácanos del descensu sí o sí.
Sobre temes arbitrales yá comenté selmanes atrás que ye un tema qu'hai que cuntar con él, y nun dai vueltes.
PUXA SPORTING!

Contador Estadistiques