David Artime gana'l segundu premiu "Arbidel" de cuentos eróticos n'asturianu

El cuentu 'Ella y Ariel', del candasín David Artime Coto, foi'l ganador de la segunda edicición del concursu lliterariu Arbidel de cuentos eróticos n'asturianu, organizáu pol Conceyu de Ribeseya dientro del marco de les actividaes de la Selmana de les Lletres Asturianes. Pela so parte, l'escritor xixonés y collaborador d'Asturies.com, Pablo Rodríguez Alonso, algamó l'áccesit col relatu 'El confesor'.

   El conceyal de Cultura de Ribeseya, Juan González Martino, fizo públicu'l fallu. El xuráu tuvo compuestu por Ana Luz Prieto Vega, especialista n'asturianu pola Universidá d'Uviéu; Roberto González-Quevedo González, secretariu de l'Academia de la Llingua Asturiana; y Xandru Martino Ruz, especialista n'asturianu pola Universidá d'Uviéu. Fizo de secretariu con voz, pero ensin votu, el mesmu conceyal de Cultura.

   La entrega de diplomes va tener llugar el próximu miércoles, día 6 de mayu, a les 19.00 hores, na Casa de la Cultura de Ribeseya, nun actu incluyíu dientro de la programación de la Selmana de les Lletres, qu'entama la Conseyería de Cultura del Principáu d'Asturies, en collaboración cola Direición Xeneral de Política Llingüística, y qu'esti añu ta especialmente dedicada a la figura de la escritora asturiana Enriqueta González Rubín.

   Ésta foi la segunda edición del concursu de cuentos eróticos. Na primera, celebrada l'añu pasáu, el premiu foi pa Xosé Nel Riesgo, pola obra 'De bandera', mientres que l'áccesit ganólu David Rivas, por 'Boedica y Doña Nuria'.

   El premiu ta dotáu con 1.200 euros, mientres que pal áccesit resérvase un gratificación de 500.