El Gobiernu asturianu da los primeros pasos pa la declaración del Paisaxe Protexíu del Sueve

La Viceconseyera de Mediu Ambiente, Belén Fernández González, aconceyóse en L'Infiestu colos alcaldes de Colunga, Parres, Caravia y Piloña, p'avanzar na declaración del Paisaxe Protexíu del Sueve. Trátase del segundu alcuentru ente los responsables de l'Alministración autonómica y los conceyos afeutaos, a la que tamién se sumaron los representantes de la Xunta d'alministración de la Comunidá de Ganaderos del Sueve.

   El conceyu s'enmarca na voluntá de la Conseyería de promover mecanismos pa garantizar la implicación y participación de los afeutaos y p'algamar el mayor nivel de consensu sobre'l paisaxe que se pretende protexer. Nesti sen, ye evidente la importancia de los organismos llocales y de los ganaderos, qu'usen los pastos de la zona, pa llograr la declaración y posterior xestión del paisaxe protexíu.

   Dende Mediu Ambiente se considera que la declaración del paisaxe protexíu va xugar un papel esencia na dinamización socioeconómica de los conceyos de Caravia, Colunga, Parres y Piloña, que tán nel so ámbitu d'influencia, según informó'l Gobiernu rexonal mediante una nota prensa.

   Asina lo planteguen les llinies estratéxiques que se proponen pa la xestión d'esti espaciu y ente les que tán actuaciones como la proteición, rexeneración y meyora de la viesca de texos, de carácter únicu n'Asturies; la conservación y meyora de les mases forestales; l'incrementu de la superficie forestal; y el caltenimientu d'aprovechamientos ganaderos y cinexéticos, ente otros.

TEXADA DEL SUEVE

   La propuesta inclúi tamién un tratamientu singular pa la Texada del Sueve, que va declarase Monumentu Natural. Contará con un programa de xestión específicu que facilite la so rexeneración y unes llinies d'aición qu'asguren el so estáu de cosnervación en términos compatibles col respetu a l'actividá ganadera de la zona.

   L'ámbitu del paisaxe protexíu se definió de magar les llendes del Llugar d'Importación Comunitaria (LIC), que van contar con una superficie de 34,54 kilómetros cuadraos. Se reduxo, poro, sobre la superficie a protexer prevista nel Plan d'Ordenación de los Recursos Naturales d'Asturies (Porna) del añu 1994 pa garantizar la so concordancia cola Rede Natural 2000.