El Conceyu de Xixón presenta un 'karaoke' de conocíos cantares n'asturianu pa promocionar la llingua

La Oficina Municipal de la Llingua del Conceyu de Xixón presentó nos sestos Alcuentros de Mocedá "Saca la Llingua", un 'karaoke' de temes conocíos de la música asturiana más popular de diferentes estilos, col fin de promocionar la llingua asturiana ente esi sector de la sociedá.

   Los cantares incluyíos son: 'Tengo de rondar to valle' y 'So vaqueiru', pieces tradicionales popularizaes pol dúu Nuberu; 'Chacho' y 'Nun yes tú', del grupu de Tolivia (Llaviana) Los Berrones; la versión del 'Chalaneru', fecha en comuña ente los hermanos Tejedor y el cantante Chus Pedro; 'Rapaza nacionaliega' y 'Canciu d'amor', de la banda avilesina de rock Dixebra; 'Mexé na caleya', composición que se fixo mui famosa hai unos años, perteneciente a La Bandina; 'La capitana', ún de los cantares más populares del músicu xixonés Carlos Rubiera; 'Sonia' y 'Los suaños, suaños son', de la formación de ska-punk Skama la Rede; y el tema de l'agrupación infantil Xentiquina 'Bocadillu rock'.

   Toles pieces se grabaron en formatu karaoke, ye dicir, ensin incluir la voz y d'una manera que seya lo más facil pa poder cantales. Los músicos que participaron son bien conocíos de la escena asturiana, pertenecientes a formaciones de folk y rock, y con una esperiencia bien allargada nel tiempu: Sergio Rodríguez (guitarres y baxu -Dixebra-), Israel Sánchez (batería -El Sueño de Morfeo-), Rubén Bada (guitarres -DRD, Dixebra-), Diego Pangua (flauta y gaita -Felpeyu-), Rubén Álvarez (guitarres -Herbamora-), Ramón Morán (teclaos -Herbamora-) y Miguel Herrero (trompeta -Los Redentores, Los Tashtornados-).