Trunfu d'Oscar Sevilla na segunda etapa de la Vuelta Ciclista a Asturies

|

El ciclista del equipu norteamericanu Rock Racing, Oscar Sevilla, ganó la segunda etapa de la Vuelta Asturies, que trescurrió ente Llanes y Xixón. Nesta xornada hubo amás cambiu nel lideratu, pasando del neozelandés Chadwick al portugués Machado.

Esta segunda etapa caracterizóse por un gran movimientu nes files del pelotón, con continuos intentos de fuga. La buena produciríase yá a pocos kilometros de la meta, nel altu de Samartín de Güerces, nel qu'escaparon ocho corredores, pero de la que se fueron descolgando la mitá del grupu, hasta llegar a les cais de Xixón cuatro d'ellos: el propiu Oscar Sevilla xunta al asturianu Samuel Sánchez (Euskaltel), el madrileñu Héctor Guerra (Liberty) y el colombianu Freddy Montana (Boyacá). Nun sprint mui reñíu diba ser Sevilla'l qu'algamare'l trunfu per delantre, por mui poco, de Samuel Sánchez.

Tiago Machado, segundu na xeneral, llegaría a 25 segundos nel siguiente grupu y venti per delantre del líder, Glenn Chadwick, lo que llevó al ciclista portugués al lideratu.

Esti xueves ye la tercer etapa, xebrada en dos sectores. Pela mañana ún de de 88,7 kilómetros, ente Xixón y Avilés, y pela tarde'l segundu, una contrarreló de 14,2 kilómetros, con salida y llegada en Piedras Blancas.

Contador Estadistiques