La III Muestra Cultural "Tolo d'Asturies" va celebrase del 14 al 17 de mayu en Llangréu

|

La tercer edición de la Muestra cultural "Tolo d'Asturies", organizada pola Agrupación Etnográfica "Reija", va celebráse ente los díes 14 y 17 de mayu nel conceyu de Llangréu. Esti eventu quier ser una amuesa d'actividaes qu'espeyen la cultura del país, especialmente no que cinca a la música asturiana. D'esti mou van entamase una serie d'actividaes ente les que rescamplen los conciertos.

Yá'l xueves a les 19:00 hores na Casa los Alberti va haber un conciertu d'Ignacio Alfayate, Filippo Gambeta, Xuan Nel Expósito y los alumnos d'acurdión de la Escuela de Música Tradicional Reija de Llangréu. El vienres na Estación d'Autobuses de Llangreú a les 22:00 hores van ser los italianos "I Liguriani" y los asturianos "Los Ciquitrinos2 xunto a "Los Gatos del Fornu" los que van poner la música a esti eventu.

Yá'l sábadu nel mesmu llugar y a la mesma hora va entamar el conciertu de "Xideces", un espéctáculu qu'axunta a más de 100 músicos nel escenariu -Banda Gaites El Llacín de Llanes y una montonera músicos de los más prestixosos grupos folk d’Asturies y que ta diseñáu ex profeso pa Tolo d’Asturies09-, qu’inclúi amás un pasucais previu dende'l Parque Vieyu de La Felguera hasta la Estación Central d’Autobuses de Llangréu. Esti conciertu tamién va contar cola presencia de la "David Munnelly Band" d'Irlanda y de les asturianes "Herbamora".

Finalmente'l domingu a les 18:00 hores na Estación d'Autobuses de Llangréu va dar un conciertu Héctor Braga, mientres qu'a les 19:15 va desendolcase "Carta blanca a Tomás Zapico". Esto ye la presentación del discu y reinterpretación d’una escoyeta de temes del repertoriu d’esti músicu de La Güeria Urbiés a cargu d’acurdionistes modernos del altor de Marga Lorences, Nel Ordóñez, David Varela o Marcos Alonso, baxo la dirección de Xuan Nel Expósito y cola collaboración y presentación de Xosé Antón Fernández “Ambás”

Asimesmo a lo llargo d'estos dies va haber un Mercáu tradicional d’artesanía y gastronomía, una Feria del discu y el llibru n’asturianu, asi como folixa y baille pa toes/os con bandines tradicionales, animación con grupos de baille y música tradicional y talleres pa neñes y neños (animación, xuegos y deportes tradicionales, artesanía…).

Asturies.com ufre a los sos llectores el programa completu de "Tolo d'Asturies" nun archivu adxuntu a esta noticia.

AdxuntuTamañu
Microsoft Office document icon Tolo d'Asturies.doc482.5 KB
Contador Estadistiques