La conseyera de Cultura presentó'l programa de la XXX Selmana de Les Lletres Asturianes

La conseyera de Cultura, Mercedes Álvarez, y la directora xeneral de Política Llingüística, Consuelo Vega, dieron anuncia del programa d'actos oficiales previstos pa la trixésima edición d'esti eventu cultural. La escritora Enriqueta González Rubín (Santianes el Agua -Ribeseya-, 1832 - L'Infiestu, 1877), va ser la homenaxada esti añu na Selmana de Les Lletres Asturianes, que se va celebrar ente'l 4 y el 8 de mayu.

   Asina, Enriqueta González Rubín, va ser la homenaxada, por ser autora de la primer obra en prosa n'asturianu: 'Viaxe del Tíu Pacho, el Sordu a Oviedo', publicada en 1875. Demientres la Selmana, van presentase tres publicaciones rellacionaes cola obra de la lliterata, amás de dellos actos institucionales celebraos en Llanes y Ribeseya, amás de la yá habitual llectural de testos na Xunta Xeneral del Principáu, n'Uviéu.

   El llunes día 4 van presentase nel Ayuntamientu de Ribeseya'l volume illustráu 'Enriqueta González Rubín: el sinciu d'una escritora del XIX', coordináu por Guadalupe Valdés y María Jesús Villaverde. Al día siguiente, na Casa de la Cultura de Llanes van presentase la edición facsímil del 'Viaxe del tíu Pacho el sordu a Oviedo'. El vienres, día 8, na Casa de la Cultura de Ribeseya va presentase'l llibru 'Obra completa', tamién de la escritora homenaxada.

   Otros actos a celebrar van ser la llectura pública institucional de testos n'asturianu na Xunta Xeneral del Principáu el miércoles, 6 de mayu, a les 13.00 hores; la conferencia de la escritora Ángeles Caso sobre 'Las olvidadas: una historia de mujeres creadoras', el marte 5, a les 19.00 na Casa de la Cultura de Llanes, la conferencia 'L'Ayuga y la pluma, vida y obra d'Enriqueta González Rubín', el xueves 7 de mayu, a les 20.00, na Casa de la Cultura de Ribeseya; o la emisión del programa de radio 'Enriqueta González Rubín, una muyer del sieglu XIX', dientro del espaciu 'Nomes d'Asturies', na radio del Principáu (RPA), el sábadu, día 9, a les 14.00 hores.

   De la mesma manera, van entregase los premios de dellos concursos rellacionaos cola creación artística n'asturianu, como'l premiu 'Arbidel', de cuentos eróticos, o los concursos de poesía y dibuxu, o de cartelismu.