La Xunta de Personal Docente denunciará los baremos pa oposiciones de primaria, que yá "nun espeyen" cursos d'asturianu

La presidenta de la Xunta de Personal Docente y máxima responsable de Suatea, Beatriz Quirós, anunció que los sindicatos van recurrir ante los tribunales los nuevos baremos de valoración de méritos pa les oposiciones d'educación primaria porque "cambiaron radicalmente". Como exemplu, esplicó que los cursos de llingua asturiana yá nun vienen espeyaos nellos.

   Asina lo criticó Quirós, xunto con Gumersindo Rodríguez (ANPE), José Ángel Piquero (CC.OO) y Gerardo Domenech (CSI-CSIF). Estos cuatro sindicatos ofrecieron una rueda de prensa p'anunciar la so intención de denunciar la convocatoria, publicada'l sábadu.
 
   Los sindicatos critiaron les modificaciones "radicales" de los baremos de valoración de méritos de formación permanente pa les próximes oposiciones de primaria, convocaes el pasáu sábadu. "Somos la última comunidá en convocar, la convocatoria ye d'un organismu que nun ye d'Educación (en referencia al institutu Adolfo Posada) y se produz esti cambiu cuando tolos interinos, tola xente que ta trabayando y la que ta preparando oposiciones, tienen una serie de cursos qu'agora nun se-yos valorarán", aseguró Quirós.

   Un exemplu que punxo de la modificación son los cursos de Llingua Asturiana, que, según la representante sindical, enantes apaecíen espeyaos nel baremu y agora non.

   Los sindicatos anunciaron que tán recibiendo abondes llamaes de profesores preocupaos por esti tema, y que lo van llevar a los tribunales.

   Dende'l puntu de vista de Quirós, ye una consecuencia más de la falta d'una mesa sectorial, na que se "negocien los temes con quien sabe". "Nós sabemos d'educación y la Conseyería tamién, pero l'Adolfo Posada non. Ta armando un tracamundiu tremendu. Otra razón pa dir a la fuelga", añadió la representante sindical.