El Ministeriu de Sanidá confirma'l primer casu de gripe porcina n'España y n'Europa, y Asturies detecta ún sospechosu

La ministra de Sanidá y Política Social, Trinidad Jiménez, confirmó que dio positivu como afeutáu de gripe porcina'l mozu de 23 años aisláu nel Hospital Xeneral d'Almansa (Albacete), como sospechosu de carecer una casu de la epidemia, tres tornar de México'l pasáu día 22 d'un viaxe d'estudios. N'Asturies, la Conseyería de Salú detectó un posible casu.

   Tres l'aumentu a 23 de los casos detectaos en Cataluña, el mapa xeográficu de los supuestos infeutaos pola gripe ye'l siguiente: Euskadi (1); Comunidá Valenciana (1); Albacete (1 infeutáu y 1 confirmáu); Cataluña (10); Aragón (1); Baleares (2); Castiella Lleón (1); Murcia (3); Madrid (1); Navarra (1), Andalucía (3); La Rioxa (1); Galicia (1); Asturies (1).

   Jiménez confirmó estos datos tres aconceyase col Comité Executivu Nacional pa la Prevención, Control y Siguimientu de la Evolución Epidemiolóxica del virus de la gripe, y a continuación va caltener un conceyu col presidente del Executivu, José Luis Rodríguez Zapatero, pa informar de la situación.

   Pel momentu, los casos que se tán estudiando son persones que tuvieren ellí y tán acabantes de volver a España. Sicasí, tres confirmase'l casu d'Almansa, les autoridaes sanitaries van "reforzar" los sistemes de control, seguridá y vixilancia en toles comunidaes autónomes.

   De fechu, se convocó a tolos conseyeros autonómicos ayeri pa un conceyu estraordinariu del Conseyu Interterritorial del Sistema Nacional de Salú. Amás, pidieron a les compañíes aérees qu'informe de la situación a tolos pasaxeros que viaxen a países con posibles afeutaos pol virus, y tamién estudien activar los arcos de temperatura de los aeropuertos.

   De la mesma manera, el Ministeriu d'Esteriores recomienda nun viaxar a México y a otros países afeutaos "menos nos casos estrictamente necesarios", anque Jiménez esplicó qu'hasta que la OMS nun dea una nueva recomendación nun se van tomar midíes.

POSIBLE CASU N'ASTURIES

   Pela so parte, la Conseyería de Salú del Gobiernu asturianu informó de la sospecha d'un posible casu de gripe porcina n'Asturies. Trátase d'una moza de 31 años que permanez ingresada n'aislamientu, nel Hospital de Cabueñes, en Xixón.

   La paciente pasó ente'l 6 y el 12 d'abril en México. El día 21 entamó a tener fiebre, más de 38 graos, con tos y dolores articulares.

   Estos síntomes ficieron que se la considerare como "un casu a estudiu", y se tomaron les muestres clíniques pertinentes qu'en 48 hores van confirmar si "se trata d'un casu de gripe porcina importada o d'otra dolencia", según confirmó güei en rueda prensa la directora xeneral de Salú Pública del Principáu, Amelia González.

   El responsable de la Conseyería de Salú esplicó que la moza nun presenta síntomes de gravedá y ta recibiendo tratamientu sintomáticu. De confirmase que ta afeutada pola gripe porcina va entamar a ser tratada con antivirales.

   "Tamos ante un casu sospechosu na midida en que se cumple la definición del mesmu, ye dicir la unión de les dos eventualidaes: fiebre y afeutación respiratoria y amás tar acabante de viaxar a México", dixo González. La responsable de Salú Pública dixo que, en tou casu, diba tratase d'una enfermedá "importada".

   La responsable de Sanidá, qu'evitó cualquier datu más sobre la paciente, afirmó que "Asturies xunto con Cantabria son les comunidaes nes que menos acasos a estudiu se detectaron, lo que nun quier dicir que la situación puea cambiar n'hores posteriores". De la mesma manera, insistió en que casos confirmaos sólo hai ún n'Albacete.

   Tresmitió, de la mesma manera, un mensaxe de tranquilidá a la población. Nesti sen, indicó que "esta mesma mañana la direición xeneral de Salú Pública convocó a tolos responsables de Primaria y Especializada colos técnicos del Sespa pa estudiar la coordinación y les midíes y protocolu a desarrollar.

   Amelia González aseguró que se tán tomando toles midíes pa siguir los protocolos apropiaos y se dispón del dispositivu de tratamientos bastantes pa facer frente a una demanda fuerte en casu de que la hubiere. González insistió en qu'ésti ye pel momentu l'únicu casu a estudiu n'Asturies.