Celébrase esti sábadu'l Conciertu pola Oficialidá

Yá ta too preparáu pa qu'esti sábadu día 25 se celebre la XXI edición del Conciertu pola Oficialidá, eventu entamáu pola Xunta  pola Defensa de Llingua Asturiana. y que xunta otra vuelta la música cola revindicación  de la oficialidá del asturianu. La organización espera muncho públicu na carpa instalada nel Campus del Milán d'Uviéu.
 
 
A partir de les 7 de la tarde van ser Tuenda los qu'abran la sesión música, que van contar con  6 grupos más ente los que tán Los Gatos del Fornu,  Felpeyu y La Bandina, y nuna estaya más electrificada y rockera Skama la Rede, Dixebra y Skontra. Les más de siete hores de música que van ufiertar estos grupos tien un preciu bien modestu, 8 euros anticipada,  10 euros na puerta. Les entraes inda tán a la venta n'Uviéu en La Casa Posafuelles. Xixón: El Trisquel, El Barucu y Llibrería Alborá. Avilés: El Cafetón. Candás: La Gueta. Tinéu: Mesón Cervantes. Cangas: Bar Azul. La Puela Allande: Café Centro. Mieres: L'Abellugu. La Pola L.lena: La Xarrina. La Felguera: El Llar de Keko. L'Entregu: Tom Mallory. Llaviana: El Riscar. La Pola Siero: Abre César. Nava: La Posta. L.luarca: Panadería Andrín, Estancu Cachona. 
 
Nel conciertu tamién se va a poder mercar Ye lo que nos pasa, el nuevu CD compilatoriu de la Xunta pola Defensa de la Llingua Asturiana. El compilatoriu arranca col cantar que pon nome al discu y que como vien siendo vezu ta fechu pol colectivu Músicos pola Oficialidá pa les movilizaciones d’esti añu 2009. Otros 15 cantares d’otros tantos grupos de rock completen el CD: Los Berrones, La Tarrancha, Skama la Rede, Sambre, Skontra, Gomeru, Misiva, Desakato, Fe de Ratas, Adizión Etílika, Mala Reputación, Fala Non Caduca, Bacotexo, Dixebra y Escuela de Odio.