UNA entama los trámites pa presentase en solitario desque’l BNG nun aceptare a la formación asturiana como sociu na coalición que va axuntar tamién a Aralar, Esquerra, Chunta, Entesa, EA y un sector de Los Verdes.

 
Cola cuenta atrás  pa les elecciones europees, entama a conocese l'asitiamientu de los partíos asturianos. UNA ta acabante anunciar que'l vetu del BNG va impedi-y tar xunto a otros partíos nacionalistes d'izquierda na coalición que ta entamándose dende va delles selmanes y a la que se foron axuntando partíos como'l BNG o un sector de Los Verdes.
Andecha Astur, qu'anunciara va delles selmanes qu'entamaba a falar colos, hasta agora, socios europeos, nun ta tampoco na coalición, y el PAS-URAS nun va presentase esta vuelta. N'Asturies, amás d'otres opciones minoritaries y les candidatures de PSOE y PP, la candidatura d'IU-ICV va tar sofitada por Izquierda Xunida, Los Verdes d'Asturies y Bloque por Asturies.
 
El vetu a UNA
UNA esclaria nuna nota de prensa, que vien salir al pasu de noticies d'axencia que la citaben como sociu d'Europa de los Pueblos -Los Verdes, que tuvo negociando colos miembros de la mentada coalición que manifestaron "la so voluntá de qu’esta organización tuviere presente como un sociu más na mesma como representante asturianu nel alcuerdu. Asina consta nos primeros documentos de trabayu de la coalición nos qu’UNA apaecía como sociu xunto a Esquerra, Aralar, EA, la Confederación Verde y Chunta Aragonesista, y poro, asina lo reflexaron estes selmanes dellos medios de comunicación y axencies d’información estatales".
Sicasí, según UNA, "la presencia  nesti alcuerdu de fuerces nacionalistes y ecoloxistes del estáu nun foi posible porque la incorporación del BNG a la coalición plantegó nueves condiciones, ente elles la esclusión d’UNA, organización que’l BNG –un partíu que pol so númberu de votos asegura l’algame del escañu nel Parlamentu Européu- consideró que nun debía ser ún de los socios". 
 
UNA agradez na so nota al restu de los componentes el so apoyu y anuncia qu'entama "los trámites pa presentar una candidatura a las elecciones europees que dexe a los asturianos y asturianes residentes nel estáu votar por una candidatura asturiana".
 
La xénesis de la coalición
La igua de la coalición Europa de los Pueblos - Los Verdes ta siendo daqué accidentada y 24 hores primero de zarrar la posibilidá d'inscribise llegalmente pa participar nes elecciones inda nun se sabe cuálos van ser tolos sos componentes yá que la participación de los mallorquinos del PSM inda nun ta clara.
Nun primer momentu la presencia d'Aralar como "sociu preferente" d'Esquerra, nun sentó bien a EA, la fuerza vasca que yera'l sociu tradicional de los catalanes. Ye más, les sos mocedaes opunxéronse a repetir la coalición. Depués, la entrada del BNG arrequexó a Aralar y el númberu de votos de los gallegos fixo qu'ERC pasare a consideralos l'interlocutor principal na coalición. Pel so llau, la entrada de la Confederación Verde fixo que les más de les federaciones d'esti partíu, ente elles l'asturiana, y el Partíu Verde Européu, se desmacaren y pidieren el votu pa IU-ICV.
 
Amás del vetu a UNA ye posible qu'Esquerra torgue la posibilidá de la entrada del PSM-Entesa Nacionalista, el partíu nacionalista d'izquierda más votáu de les Baleares, porque los catalanes píden-yos que se comprometan a una coalición pa les elecciones autonómiques y nesti momentu dende fontes del PSM afírmase que nun van doblar ente lo que consideren un "xantaxe".