Rozadas llucha por salvar 'El Carbayón'

Los vecinos de Rozadas, nel conceyu de Bual, quieren salvar 'El Carbayón', nome que recibe un pládanu de más de 300 años del pueblu. Una propietaria de parte del terrén u s'asitia quier valtialu pa dexar pasu a maquinaria pa una obra, pero recibe'l refugu del restu d'habitantes de Rozadas. Dada la situación, l'asociación Amigos del Texu entamó una campaña pa salvar 'El Carbayón' al traviés de Change.org que suma más de 3.600 firmes. Nella demanden al Gobiernu proteición pal árbol.

 

Equo Occidente y Andecha Astur son dalgunes de les formaciones y coleutivos que se sumaron a la causa. En concreto, los nacionalistes anunciaron la presentación d'escritos nel Conceyu de Bual y nel Gobiernu pa que'l 'El Carbayón' "gocie de la debida proteición pa torgar que pueda llegar a ser cortáu según la voluntá espresada polos sos nuevos dueños, nun dando llicencies nin permitiendo'l so corte mentes dure'l procesu de proteición".