La cifra de negocios nel sector servicios cai un 16,9% en febreru n'Asturies y l'emplegu un 3,1%

La cifra de negocios nel sector servicios baxó un 16,9% en febreru n'Asturies en comparanza col mesmu mes del añu anterior. Esti descensu ye inferior al esperimentáu nel conxuntu del Estáu, onde la cayida foi del 20,5%, la mayor en seis años. Según los datos espardíos güei pol Institutu Nacional d'Estadística (INE)  l'actividá nel sector tuvo un comportamientu negativu en toles comunidaes autónomes, siendo Asturies, xunto con Cantabria, la tercera con una menor cayida, per detrás de Galicia (-14,2%) y Aragón (-16,3%).

   Nel estremu opuestu asitiáronse Murcia (-23%) y Madrid y Castiella La Mancha (-22,4%), que fueron les rexones con mayores descensos na cifra de negocios del sector servicios.

   Polo que se refier al emplegu nel sector, ésti cayó igualmente en toles comunidaes, fundamentalmente en Valencia (-8,1%), Canaries (-7,9%), Castiella La Mancha (-6,7%) y La Rioxa (-6,6%).

   Pela so parte, Asturies foi la segunda autonomía con un menor descensu (-3%), per detrás de Galicia (-2,5%), y mui asemeyada a Cantabria (-3,1%). A nivel nacional, la cayida del emplegu foi la mayor de les rexistraes nos útlimos seis años.

   Con too ello, nel conxuntu del Estáu yá son diez los meses siguíos nos que'l sector servicios baxa les sos ventes y ocho los que pierde emplegu, confirmando asina los efeutos negativos que ta teniendo la crisis económica sobre esti sector d'actividá.

   Tolos sectores amenorgaron la so cifra de negocios en febreru. Comerciu foi'l sector que rexistró'l mayor descensu, con una tasa interañal del -23,5%, siguíu de tresporte (-19%), servicios a empreses (-14,2%), turismu (-14%) y teunoloxíes de la información (-7,5%).

   Por actividaes, sólo una, la rellacionada con investigación y seguridá, incrementando les sos ventes en febreru en tasa interañal, con un avance del 2,1%. El restu d'actividaes baxó la so facturación en febreru, siendo los mayores descensos los de vehículos, motos y respuestos (-44,4%) y les actividaes rellacionaes col emplegu (-39,2%).