Nueva y preocupante derrota del Sporting

L’Sporting salió derrotáu otra vuelta, nesta ocasión contra’l Betis, nun partíu floxu de dambos equipos. Esta nueva derrota asitia a los asturianos nuna situación que fai peligrar seriamente la so permanencia na máxima categoría del fútbol. La visita del Espanyol esti xueves que vien va ser clave nes opciones sportinguistes pa la permanencia.

Partíu aburríu y derrota merecida del Sporting énte un Betís que, sicasí, nun foi muncho meyor que los asturianos, anque salió más centráu y coles idees más clares. Y la recompensa llegó bien ceo, gracies a una paré d’Emaná con Oliveira que remata’l primeru nun trallazu imposible de parar pa Cuéllar, que volvió a la titularidá na portería xixonesa. A partir d’esi momentu l’Sporting puso empeñu n’empatar, pero mui poco xuegu, nun llevando peligru real a la portería local a lo llargo de la primera parte. El Betis, nun xugando muncho meyor, tuvo alguna ocasión mas, como la d’Oliveira nel 39 que remató nel aréa, mandando’l balón fuera a pocos centimetros del poste visitante.

Na segunda parte l’Sporting espabiló un poco, quitó a Maldonado y Kike Mateo saliendo al campu Luis Morán y Bilic, colo que l‘equipu ganó dalgo de frescura nel ataque, pero fallando nos últimos metros, nesi últimu pase que puede dar el gol. Sicasí diben ser los andaluces lo que meteríen el segudu y definitivu gol nel minutu 70, tres un balón bombiáu que Cuéllar nun foi quién a blocar, tocándolu lo suficiente pa que llegare a los pies de Jose Ángel nel área. Esti zapicó, y Edu robo-y’l balón, centrándolu darréu pa que otra vuelta Emaná marcare a placer. Ehí acabaron les opciones de remontada de los sportinguistes. Cinco mintuos depúes Cuéllar foi espulsáu por unes manes fuera del área y nel 79’l béticu Arzu tamién por doble amariella. Con dambos equipos con diez xugadores, l’Sporting tuvo la ocasión más clara nuna buena xugada ofensiva de Camacho que remató Bilic, evitando Ricardo’l gol del honor de los asturianos.

En definitiva mal partíu d’un Sporting espesu, ensin les idees clares y tocáu moralmente polo pésimos resultaos nes últimes xornaes. Ayer notóse muncho, mas de la cuenta, l’ausencia del xugador más desequilibrante nel aspectu ofensivu del equipu, Diego Castro. Y esti xueves a les 20:00 hores los asturianos reciben al Espanyol n’El Molinón nuna auténtica final na que solo val el trunfu. 
 
Ficha técnica

Real Betis 2- Sporting de Xixón 0

Real Betis: Ricardo, Nelson, Arzu, Juanito, Monzón; Mehmet Aurelio, Capi (Rivera, m.64); Edu (Juanma, m.77), Emaná (Rivas, m,86), Mark González, y Oliveira.

Sporting: Cuéllar; Sastre, Neru, Gerard, José Angel; Michel, D. Camacho; Maldonado (Bilic, m.66), Carmelo, Kike Mateo (Luis Morán, m.66); y Barral (Lafuente, m.76).

Goles: 1-0: m.7, Emaná. 2-0: m.70, Emaná

Árbitru: Julián Rodríguez Santiago (castellanu-lleonés). Espulsó a los 75 minutos a Cuéllar, por tocar el balón col brazu fuera de l’área énte Oliveira, y a Arzu, por doble amareilla (m.45 y m.79). Sacó tarxetes amarielles a Michel (m. 41), Camacho (m. 52), Luis Morán (m. 88) Mark González (m.91+), Sastre (m.91+).