El XI Mercáu Tradicional La Flor de Ḷḷena enllena'l barriu La Caleya d’artesanía, música y folixa

|
La Pola Ḷḷena celebra esta fin de selmana les fiestes de La Flor y, con elles, el XI Mercáu Tradicional La Flor de Ḷḷena nel barriu La Caleya. L’actuación principal del sábadu va tar protagonizada por Skama la Rede, Skontra y La Tarrancha.
 
La Xunta Cultural Rebelgu programa, un añu más, una riestra d’actividaes en La Caleya pal sábadu y el domingu que faen obligada la visita al Conciyu de Ḷḷena. El mercáu, nel que participen 70 artesanos, va principiar a les 10 hores, con actuaciones de baille y música a lo llargo del tol día, anque l’apertura oficial ta prevista pa les 11, momentu del pregón y de l’alborada a cargu de la Banda Gaites Güestia. Yá de tarde, a les 16 hores, va celebrase’l IV Alcuentru Folclóricu La Flor de Ḷḷena y, a les 19.30 hores, va tener llugar un conciertu de David Payares. Los encargaos de zarrar el día y animar la nueche van ser, a partir de les 22 hores, Skama la Rede, Skontra y La Tarrancha.
 
Yá de domingu, l’actividá nel mercáu va principiar a les 11 hores cola actuación de La Bandina’l Vaḷḷe, centrándose na tarde la mayor parte del programa. Asina, a les 17 hores van entamase xuegos tradicionales pa neños y neñes, cuentacuentos interactivos con animales, globoflexa y talleres de pintura, a lo qu’hai que sumar el II Certame de Gaiteros Mozos. Una hora depués va celebrase’l II Concursu d’Escanciadores y, a les 19 hores, el Festival de Canción Asturiana con Vicente Prado ‘El Pravianu’ y Celestino Rozada. Va poner el ramu Tuenda, a les 21 hores, con un conciertu nel escenariu principal, al que va siguir una pinchada de Guzmán nel chigre de la folixa.
 
Actividaes nel restu del pueblu
 
Amás de la programación de la Xunta Cultural Rebelgu, el Conciyu de Ḷḷena tamién entama actividaes nel restu del pueblu dende güei mesmu, cola representación del espectáculu ‘Palabres’ nel Teatru Vital Aza (20.30 hores). Mañana, nel mesmu sitiu, Produciones Nun Tris va representar la so obra ‘Xuanón namoráu’ (20 hores), tamién al preciu de 6 euros. Yá de nueche, la primer verbena va tar protagonizada por Impacto y La Orquestina, mientres que’l domingu’l turnu va ser pa Player’s y Dúo Fusión. Por último, el llunes celébrase la xuba al prau de La Flor, momentu más esperáu por ḷḷenizos y ḷḷenices.
 
Contador Estadistiques