La Bandina pon clas

La Bandina va tocar esti domingu en Xixón d'un xeitu daqué diferente a lo que ye habitual nel grupu. Nun va cambiar la música de La Bandina, pero sí va ser diferente la manera na que se desarrolle'l conciertu, ya que l'actuación ta dientro nel programa "Música Maestro" que busca xuntar lo didactico col espectáculu musical.
 
"Música Maestro" ye una iniciativa del Teatru Xovellanos que plantega que l'escenariu del foru xixonés pueda sirvir non solo pa escuchar, sinón pa deprender dalgo sobre la música que s'escucha. Asina, esti tipu de conciertu plantega que los músicos del grupu que toquen despliquen cómo y por qué la so música ye asina. Esti formatu ye especialmente interesante con grupos que se basen nes músiques tradicionales, y esi va ser el casu del conciertu del próximu domingu día 19, nel que'l grupu de folk asturianu La Bandina va facer un conciertu didacticu. Los responsables de "13", últimu discu de la banda, van facer el conciertu col dalgo d'ayuda pa que seya más completu tanto no tocantes a la música como a lo didáctico. Ello ye que'l cantante, investigador del folclore y comunicador Xosé Ambás, y la cantante de tonada Anabel Santiago van acompañar a La Bandina nesti conciertu, que va facese tamién nun horariu un poco especial, a les 12:00 la mañana, esti domingu día 19. La entrada ye de namás de 4 euros y puede retirase yá nes taquiyes del Teatru Xovellanos.