Llangres presenta'l so discu n'Uviéu

Esti vienres Llangres va siguir cola so xira de presentación del so últimu discu Entá. El teatru Filarmónica d'Uviéu va ser esta vegada l'escenariu que va acoyer los sones del discu d'esti grupu de la cuenca'l Nalón.
 
La cuenca’l Nalón vio nacer esti grupu alllá 2002 xuntando músicos del conservatoriu de la zona. Nel entamu, col primer discu “Stura”, Llangres tiró per una llínia de folk atlánticu, fiel a los cánones marcaos nesti estilu. Pero col tiempu esi folk foi enllenándose d’otros matices y sonoridaes, per un llau la llegada al grupu de la cantante Esther Fonseca fexo que los temes cantaos ganaran muncha importancia nel repertoriu del grupu, y per otru, la banda foi adulces chiscando esos temes cantaos de toques pop.
 
Esta tendencia vióse bien clara nel discu que presenten esti vienres 17 n'Uv iéu, a les 20:30 hores, qu’espublizaron na seronda de 2008, y que llevó’l pasáu  27 d’avientu’l premiu al meyor discu pop del añu nos premios de la crítica RTPA 2008. Pa llevar el soníu de “Entá” al directu, Llangres reforzó la so formación con nuevos instrumentos. Asina, siguen tando Viriu Fernández nel bodrhan y el bouzouky, Dolfu Fernández col vigulín, Borja Baragaño cola gaita y la xiblata, Yago Prado na guitarra y nel arpa y Esther Fonseca, reciente ganadora nel premiu al meyor cantar n’asturianu de la SGAE, na voz. A esta nómina de músicos folk súmase’l baxu de Pablo Álvarez, la batería de Javier González y Alfredo González col tecláu.