L'asturianu, protagonista recién nos medios catalanes

La nuesa llingua foi protagonista recién en dos medios de comunicación del país mediterráneu: nel diariu Avui, qu'ufrió a los sos llectores un reportaxe tituláu "L'asturià dóna la cara" ("l'asturianu da la cara"), y na revista "Els marges", qu'asoleyó nel so últimu númberu un estudiu del filólogu Ramón d'Andres tituláu "Astúries i l’asturià a la traducció catalana de la Historia universal de Paniceiros". 

El pasáu vienres el diariu catalán Avui, dientro d'una serie de reportaxes denominaos "els altres billingüismes" ("los otros billingüismos") nel que faen un repasu a la situación anguaño del aragonés o del aranés, asoleyó un reportaxe tituláu "L'asturià dóna la cara" ("l'asturianu da la cara") nel que se repasa la historia recién del movimientu de recuperación llingüísticu nel nuesu país. D'esti mou'l periodista Jordi Palmer dibuxaba ampliamente'l panorama del asturianu n'actualidá, les distintes campañes en favor de la cooficialidá, la posición de los distintos partíos sobre'l tema, la dicotomía ente la denominación bable y asturianu o'l puxu del nuesu idioma nos medios dixitales, ente los que citaba Asturies.com.

Per otru llau la revista lliteraria catalana "Els Marges" asoleyó nel so últimu númberu un artículu del profesor de filoloxía de la Universidá d'Uviéu y académicu Ramón d'Andrés tituláu "Astúries i l’asturià a la traducció catalana de la Historia universal de Paniceiros" ("Asturies y l'asturianu na traducción catalana de la Historia universal de Paniceiros"), nel qu'analiza cuestiones llingüístiques y culturales alredor de la traducción al catalán del llibru Historia Universal de Paniceiros, de Xuan Bello, publicáu nel añu 2008.

El reportaxe del Avui puede lleese nesti enllaz.