La Xunta pola Defensa de la Llingua presentó'l XXI Conciertu pola Oficialidá

|

La Xunta pola Defensa de la Llingua Asturiana y la so estaya de mocedá, Xunta Moza, presentaron güei los detalles de la XXI edición del Conciertu pola Oficialidá, ún de los eventos más relevantes del panorama musical asturianu que vien faciéndose añu tres añu ininterrumpidamente dende 1988. Nesta ocasión, el conciertu va facese n’Uviéu nel recintu del Campus d’Humanidaes de Santuyano, el sábadu 25 d’abril a partir de les 7 de la tarde. Ellí va instalase una carpa xigante y dos escenarios de grandes dimensiones que van alternar ininterrumpidamente les actuaciones de Tuenda, Los Gatos del Fornu, La Bandina, Felpeyu, Skama la Rede, Dixebra y Skontra.

En palabres de los representantes de la XDLLA va ser "un montaxe espectacular que va servir de xuru pa unir música, folixa y reivindicación llingüística. Más de siete hores de la meyor música asturiana en vivo, con estilos que van dende la canción asturiana más tradicional al rock del sieglu XXI".

El Conciertu pola Oficialidá vien siendo un buen botón de muestra de la bayurosa creación musical n’asturianu que, pola so calidá, diversidá de propuestes musicales y pola participación siempre solidaria de los músicos, fai rescamplar "la enerxía d’un movimientu de reivindicación llingüística mui activu y comprometíu".

Va presentase un nuevu CD recopilatoriu

D’otra banda, el conciertu va ser tamién el sitiu afayadizu de presentación del nuevu CD compilatoriu de la Xunta pola Defensa de la Llingua Asturiana. Dieciséis cantares qu’inclúin el nuevu single de Músicos pola Oficialidá pa esti añu 2009 “Ye lo que nos pasa”.

Músicos pola Oficialidá ye un colectivu formáu por artistes de diferentes estilos que cada añu s’axunten pa crear y donar a la Xunta pola Defensa de la Llingua Asturiana un cantar que sirva de banda sonora orixinal de la reivindicación llingüística. El discu complétase col otros quince cantares d'otros tantos grupos de rock n’asturianu qu’asinamesmo collaboren col so trabayu a la financiación de les campañes y actividaes de la Xunta.

No tocante a la parte reivindicativa que da cuerpu a esti nuevu Conciertu pola Oficialidá, la Xunta pola Defensa de la Llingua Asturiana "nun pue otro que llamentar la escepcionalidá de la situación del patrimoniu llingüísticu asturianu y la sordera institucional que carez l’acomodada clase política asturiana.Ventiún años usando la música pa reivindicar unos derechos que yá esfruten cuantayá’l restu de ciudadanos del Estáu".

Contador Estadistiques