L’Sporting ponse a un pasu del descensu

L’equipu asturianu perdió contra’l Valencia nel Molinón y ponse a namás un puestu del descensu. Nun partíu nel que merecieron meyor suerte, los asturianos perdieron a tres minutos del final, nun pudiendo o nun queriendo amarrar a lo menos un puntu. A too ello añadiose una actuación arbitral que volvió amosar una tendencia non casual nesti colectivu: énte la duda, siempre a favor del grande.

La visita del Valencia de David Villa a El Molinón nun pudo ser más frustrante pa la parroquia xixonesa, por cuenta qu’anque los locales dominaron el xuegu bona parte del partíu, siempre fueron a remolque de los valencianistes nel marcador, qu’amás marcaron el gol de la victoria cuando l’afición yá daba por buenu l’empate.

La primera parte foi de dominiu claru del Sporting, que chocó nes sos acciones col bon facer que da la veteranía del porteru César, dalgo que sucedería durante tol partíu. Sicasí’l Valencia, feble na parte defensiva, amosó una efectividá plasmante nel ataque. Na primera llegada, Silva, tres una serie de recortes, colocó’l balón na rede local. L’Sporting nun baxo los brazos y acabaría llegando la recompensa gracies a un penalti fechu sobre Carmelo que tresformaría Barral. Col empate llegaríase a la segunda parte.

Nos últimos 45 minutos el Valencia decidió echase arriba buscando la victoria, mientres l’Sporting intentaba sorprender al contragolpe. Un penalti inocente (otru más nel haber de la defensa sportinguista) propició’l gol de David Villa, que, por cierto, pidió disculpes a la grada por marcar. Otra vez el Valencia per delantre nel marcador, y otra vuelta cambiu de papeles: agora l’Sporting volvía a dominar y el Valencia esperaba sorprender a la contra, hasta que nel minutu 70 llegó’l gol local gracies a un remate de cabeza de Bilic tres un centru de Diego Castro. Sicasí l’Sporting nun daba por buenu l’empate, y buscó la victoria, pero sería’l Valencia, gracies a un contrataque precedíu d’una falta a José Ángel non señalada, el que marcaría’l tercer y definitivu gol, obra de Mata.

Delles son les conclusiones depués del partíu d’ayer: L’Sporting sigue mui feble en defensa, regalando acciones clares de gol o directamente faciendo penaltis innecesarios. A esto añádese que’l porteru Lafuente, si bien nun se-y puede culpar de nengún de los goles, si dexa siempre la sensación de que pudo facer daqué más pa evitalos.

Otra de les conclusiones ye qu’a estes altures de campeonatu un puntu, y mas contra’l Valencia, ye d’oru, y si bien ye verdá que l’ambición del equipu xixonés dio bien de puntos, nesta ocasión el dir a por toes col marcador con empate a dos fue, a lo menos, imprudente.

Queden ocho xornaes, y l’Sporting tien que visitar agora al Betis y recibir al Espanyol. Dos partíos claves sobre rivales directos na llucha pola permanencia que van decidir el futuru del equipu asturianu na maxima categoría del fútbol. 

Ficha Técnica

Sporting de Xixón 2- Valencia 3

Sporting: Lafuente, Sastre, Iván Hernández, Neru, José Ángel, Michel (Kike Mateo m. 81), Diego Camacho, Luis Morán (Bilic m. 64), Carmelo (Raúl Cámara m. 85), Diego Castro y Barral.

Valencia: César, Albiol (Miguel m. 81), Maduro, Marchena, Alexis, Albelda, Pablo Hernández (Joaquín m. 71), Michel (Baraja m. 51), Silva, Villa y Mata.

Goles: 0-1 Silva (m.18), 1-1: Barral de penalti (m. 33), 1-2: Villa de penalti (m. 54). 2-2: Bilic (m 70), 2-3: Mata (m. 87).

Árbitru: Fernández Borbalán (andaluz). Sacó tarxetes amarielles a los sportinguistes Neru (m.39), José Ángel (m.50), Diego Camacho (m.60), Sastre (m.87) y a los valencianistes Michel (m.23), Albiol (m.26), Villa (m.39).