Los nacionalistes europeos axúntense en Barcelona con presencia asturiana

La pasada fin de selmana celebróse en Barcelona l’Asamblea Xeneral de l’Alianza Llibre Europea (ALE), la federación qu’agrupa a los más de los partíos nacionalistes d’Europa. Nesti alcuentru participó UNA representando a Asturies como organización convidada.
 
La delegación d’UNA tuvo formada por dos miembros de la so Executiva Daniel Fernández y Yolanda González. Según Unidá Nacionalista Asturiana "los representantes d'UNA caltuvieron conceyos colos partíos miembros de l’ALE nos que los delegaos de les organizaciones polítiques europees recibieron información sobre la UNA, asina como sobre la situación política y social n’Asturies y sobre la llingua asturiana".  Ún de los oxetivos d'UNA cola presencia na Asamblea yera entamar el procesu d'incorporación como miembros de plenu derechu a l'ALE pa lo que la federación cumple colos dos requisitos principales que son "asumir los oxetivos de la federación y que’l partíu cuente nes sos files con representantes institucionales" según comentó Daniel Fernández a Asturies.com.
Yolanda González y Daniel Fernández tamién aconceyaron con Nelly Maes, presidenta de l’Alianza  y Günther Dauwen, Director de la federación (na semeya) colo qu'entamaron el procesu d'incorporación d'UNA a l'alianza.
 
L’Alianza Llibre Europea creóse en 1981, buscado axuntar les fuerces de les organizaciones polítiques europees que defenden el derechu d’autodetermín de los sos países y axunta partíos mui heteroxeneos (dende rexonalismu de centro a independentismu socialista) anque predominen los partíos d'izquierda nacionalista, que ye tamién la base de los sos principios programáticos. Nel estáu español pertenecen anguaño a l'ALE dende'l Partíu Andalucista al BNG, pasando por ERC, Chunta Aragonesista (CHA), el Partíu Socialista de Mallorca (PSM) y EA. Ente los partíos d'otros estaos rescamplen pola so importancia los galeses Plaid Cymru o los escoceses SNP que conviven na ALE con partíos pequeños de minoríes nacionales que en dellos casos namás cuenten con representación institucional en conceyos, como ye'l casu del nacionalismu asturianu esplica Daniel Fernández qu'amiesta que se trata de "poner a Asturies nel mapa, que se conoza'l nuesu casu n'Europa con una presencia y una interlocución directa y que nós podamos deprender d'unes esperiencies tan heteroxenees como les qu'existen na ALE".
Na actualidá son 32 los partíos que pertenecen a esta federación que tien representación nel parlamentu européu al traviés de 5 diputaos que s’encuadren dientro del grupu parlamentariu Los Verdes Europeos/Alianza Libre Europea.