Iniciativa pol Asturianu entama delles actividaes en Cangas del Narcea coincidiendo cola UABRA

La Universidá Asturiana de Branu (UABRA), que tien como sede Cangas del Narcea, ta viviendo la fin de la primer selmana de clases. Iniciativa pol Asturianu quier sumase a esti eventu académicu col entamu de delles actividaes.
 
Asina, la organización cívica que trabaya pola normalización del asturianu arriquez el programa d’eventos complementarios a les clases qu’entama la UABRA: cuatro conferencies, dos actuaciones musicales y una esposición. La primer de les actividaes que va poner en marcha Iniciativa pol Asturianu ye un concursu-karaoke n’asturianu que va tener como sede la discoteca Zaycor el martes a partir de les 22.30 hores. Mentes, el xueves, a les 20 hores nel salón d’actos, ta prevista una charra informativa sobre’l coleutivu que va dir acompañada d’audiovisuales. Amás, profesores y alumnos van poder presenciar la grabación en direutu del programa de radio ‘Iniciativa pol Asturianu nes ondes’ y mercar llibros a baxu coste nun puestu informativu que se va instalar na Escuela-Hogar, onde se celebra la UABRA.
 
Mañana, sestu día de la Universidá Asturiana de Branu, van finar dalgunos de los cursos que dieron aniciu’l llunes: el de capacitación en gallego-asturiano y el de ‘Capacitación pa la traducción al asturianu’ y ‘Internet y escuela. Nueves aplicaciones socieducatives’, éstos últimos dientro de los cursos d’afondamientu cultural y llingüísticu. El llunes van tomar el relevu los de ‘Ecoloxía y Mediuambiente n’Asturies’ y ‘Cantares, bailles ya instrumentos musicales asturianos’, tamién incluyíos nesta estaya, y van continuar l’elemental de llingua asturiana y l’avanzáu, dambos con una duración de 60 hores llectives.
 
Pa la selmana qu’entra va permanecer abierta la esposición ‘Mente y cuerpu. La Universidá d’Uviéu, el deporte y l’olimpismu. L’olimpismu asturianu’ nel Palaciu d’Omaña y l’Academia de la Llingua Asturiana, organizadora de la UABRA xunto a la Universidá d’Uviéu y el Conceyu de Cangas del Narcea, tien programaes dos conferencies y una actuación musical. Asina, el martes a les 19 hores, nel salón d’actos del IES de Cangas, José Alba Alonso, profesor titular del departamentu d’Economía Aplicada de la Universidá d’Uviéu y especialista n’economía internacional y el desarrollo asociáu colos recursos naturales, amás de vicepresidente de l’Asociación Asturiana d’Amigos de la Naturaleza (ANA), va tratar sobre ‘Economía y futuru n’Asturies’, mentes que Carlos Lastra, presidente d’esti coleutivu ecoloxista, profesor titular del departamentu de Bioloxía d’Organismos y Sistemes de la Universidá d’Uviéu y académicu, va impartir una charra de nome ‘Asturies ¿Paraísu Natural?’. Completa la programación un conciertu d’Héctor Braga’l miércoles, a partir de les 22.30 hores, nel Teatru Torenu. Toes estes actividaes tán abiertes a la población de Cangas y a visitantes.

secciones: