Skip to content

Los sindicatos piden a los mineros que tornen al trabayu

Agostu 2, 2012 por E.P. / Redacción

CO OO y UXT tán acabantes de solicitar a los mineros qu’abandonen los zarros y que tornen a los sos puestos de trabayu. D’esta forma pretenden dar un xiru a les movilizaciones del sector tres 65 xornaes de fuelga.
 
El secretariu xeneral de la Federación d’Industria de Comisiones Obreres (CO OO), Felipe López, esplicó que dambos sindicatos van llamar a la vuelta a l’actividá a les empreses mineres y anunció que, dientro d’unos díes, van convocar un calendariu de movilizaciones nueves". “El sector va recargar les piles pa ponese, una vegada más, nuna movilización indefinía hasta qu’esti Gobiernu admita que perdió la razón", añadió.
 
La intención de los sindicatos ye continuar colos aconceyamientos pa dar "aire nuevo" a les actuaciones que se van desendolcar. "Si dalguien piensa qu’esto fina equí, ta equivocáu dafechu", sorrayó’l secretariu xeneral de Fitag-UXT, Víctor Fernández, que calificó al presidente del Gobiernu estatal, Mariano Rajoy, al ministru d’Industria, José Manuel Soria, y al secretariu d’Estáu d’Industria, Fernando Martí, de "mentirosos que traten d’humildanos". Dambes organizaciones sindicales denunciaron l’actitud d’Industria, qu’a lo llargo del alcuentru d’ayeri plantegó que nun tenía capacidá pa llegar a alcuerdos que solucionen el conflictu de la minería y pidió al sector que presente una propuesta nueva per escrito.
 
Fernández recalcó que’l sector mineru "nun va parar hasta que l’Executivu ceda nes sos pretensiones de zarrar la minería del carbón, de destruyir puestos de trabayu y de convertir les zones mineres en guetos". Pa CC OO, la postura adoptada por Industria en la reunión d’ayeri supón "la mayor humildación sindical en munchos años". López considera que "esto amuesa qu’hai una apuesta nidia por parte del Gobiernu que nun tien nada que ver coles xustificaciones económiques nin coles restricciones presupuestaries" y afirma que ye una decisión que camina “hacia’l pieslle de la minería”. Por esti motivu, los sindicatos negáronse a volver a unviar una propuesta escrita al ministeriu: “eso yá se fixo y nun sirvió de nada”.
 
"Vamos gobernar nosotros esti conflicto, non ellos. Si piensen que depués de les sos actuaciones últimes vamos ceder, confúndense", sorrayó López, qu’afirma que’l problema de la minería "va tar na axenda permanente” del estáu y “va confluyir con toles movilizaciones que se faigan".
 
Los mineros de los pozos Candín y San Nicolás finen col zarru
 
Los trabayadores zarraos nos pozos San Nicolás y Candín dende’l 16 de xunetu pasáu van finar la so protesta esta tarde. Los mineros de la esplotación mierense abandonarán el pozu a les 17.30 hores, mentes que los de la llangreana fairánlo a les 20 hores, según informó UXT.

Comparte...