Skip to content

Catalunya planta al Gobiernu estatal y Andalucía cola de la reunión del Conseyu de Política Fiscal

Xunetu 31, 2012 por E.P. / Redacción

Catalunya nun mandó representante nengún a la reunión del Conseyu de Política Fiscal y Financiera (CPFF), mentes que la conseyera andaluza coló de la mesma a la hora del so entamu. Asturies y Canarias votaron en contra de los oxetivos de déficit.
 
Na rueda de prensa posterior al Consell Executiu de güei, el voceru del Govern, Francesc Homs, indicó que'l conseyeru d'Economía y Conocimientu, Andreu Mas-Colell, nun diba a viaxar a Madrid a la reunión d’esta tarde. Amás, comentó que se dirixó per carta al Ministru de Facienda y Alministraciones Públiques, Cristóbal Montoro, pidiéndo-y una "rectificación" nes sos polítiques. Según Homs, si les instituciones europees modificaron la so postura ante la deuda del Estáu mientres les últimes selmanes, lo mesmo tien que facer el Gobiernu estatal porque la situación financiera de les autonomíes ye insostenible.
 
Mentes, Carmen Martínez Aguayo, decidió colar de la reunión al tar en desalcuerdu col repartu de los oxetivos de déficiti y deuda que plantega l’Executivu. D’esta forma, namái Asturies y Canarias votaron en contra de la propuesta de Montoro, que sí tuvo l’apoyu de los territorios gobernaos pol PP, incluyíos Castilla y Lleón, y Extremadura, que na reunión anterior astuviéronse. Asina, les comunidaes nun van poder superar un déficit del 0,7 por cientu del PIB esti añu; del 0,1 por cientu, nel 2014; y han d’algamar un superávit del 0,2 por cientu pal 2015.
 
Na semeya, Homs nel momentu d'anunciar la decisión del Govern de nun unviar representante a la reunión de Madrid.

Comparte...