El gallegu yá nun ye l’idioma más emplegáu en Galicia

La Real Academia Galega ta acabante de distribuir el “Mapa Sociolingüístico de Galicia 2004”, nel que s’afita que dende l’añu 1992, primer vez que se fixo esti informe, hasta los datos últimos recoyíos en 2004, la llingua gallega pasó de ser l’idioma habitual pal 61% de los gallegos a selo, doce años depués, de solo’l 39%.

Según conseña’l “Mapa Sociolingüístico de Galicia 2004” nesos doce años duplicáronse’l númberu de persones que nunca falen gallegu, pasando del 13 al 25, 8 %, mientres que los monollingües en gallegu pasaron del 30,5 % al 16% asina como los que lu usen mayoritariamente, baxando del 31% al 23%. A la contra, aumentó’l númberu de los qu’empleguen mayoritariamente’l castellán, del 26 al 35%.

Les grandes ciudaes y la mocedá esprésense mayoritariamente en castellán

Otru datu que rescampla d’esti informe ye que si en 1992 el gallegu yera’l primer idioma d’un 60,3% de los gallegos, nel 2004 baxó a un 20,6%. Asimesmo un 10,7% de los menores de 18 años gallegos afiten que recibieron la so enseñanza namás en castellán.

Per otru llau nes grandes ciudaes predomina’l castellán, onde ye la llingua más usada pol 85% de los habitantes de Ferrol, y pol 81,9% de los de La Coruña y Vigo. Los monollingües en castellán representen amás un 57,5% de los ferrolanos y un 45,5% de los vigueses.

Mientres los monollingües en gallegu asitien mayoritariamente nos conceyos de menos de 5.000 habitantes, representando’l 40,5% de los sos habitantes.

Polémica alredor del “Mapa Sociolingüístico”

Estos datos fueron presentaos publicamente esta selmana pola Mesa pola Normalización Lingüística y non pola Real Academia Galega, autora del informe, lo que suscitó les crítiques de los defensores del gallegu. D’esti mou, Carlos Callón, representante de la “Mesa pola Normalización” conseñó que la institución académica gallega dispón d’estos datos hai meses y llamentó "que nun los presentase públicamente y que solo entamase a distribuíse esti trabayu peles llibreríes depués de les elecciones autonómiques, yá que les conclusiones que se saquen sobre l’anterior mandatu del PP son contundentes y desmonten, otra vuelta, la demagoxa y la falacia d’esti partíu sobre’l gallegu na enseñanza".